16 വര്‍ഷത്തെ ഇടവേളയ്ക്ക് ശേഷം സംവിധാനരംഗത്തേക്ക് തിരിച്ചെത്തി രഞ്ജി പണിക്കര്‍. ഗുഡ്വില്‍ എന്റര്‍ടൈന്മെന്റ് ബാനറില്‍ ജോബി ജോര്‍ജ് തടത്തില്‍ നിര്‍മിക്കുന്ന ചിത്രത്തില്‍ ഫഹദ് ഫാസിലാണ് നായകന്‍. ഫഹദിന്റെ പിറന്നാള്‍ ദിനത്തിലാണ് പ്രഖ്യാപനം. സിനിമയുടെ ടൈറ്റില്‍ ഉടന്‍ തന്നെ പ്രഖ്യാപിക്കുമെന്ന് നിര്‍മാതാക്കള്‍ അറിയിച്ചു. ഒരു മിനിറ്റ് ദര്‍ഘ്യമുള്ള വീഡിയോക്കൊപ്പമാണ് പ്രഖ്യാപനം.
ഷാജി കൈലാസിന്റെയും ജോഷിയുടെയും ഫയര്‍ ബ്രാന്‍ഡ് നായകകഥാപാത്രങ്ങളെ അവതരിപ്പിച്ചുകൊണ്ടാണ് തിരക്കഥാകൃത്ത് എന്ന നിലയില്‍ രഞ്ജി പണിക്കര്‍ മലയാള സിനിമയില്‍ സ്വന്തം സ്ഥാനം നേടിയെടൂത്തത്. തന്റെ തിരക്കഥയില്‍ ഷാജി കൈലാസ് സംവിധാനം ചെയ്ത കമ്മീഷണറിന്റെ സ്വീക്വലായ ഭരത് ചന്ദ്രന്‍ ഐപിഎസ് സംവിധാനം ചെയ്തുകൊണ്ട് 2005ലായിരുന്നു രഞ്ജി പണിക്കര്‍ ആദ്യമായി സംവിധായകനായത്. പിന്നീട് മമ്മൂട്ടിയെ നായകനാക്കി രൗദ്രം എന്ന സിനിമയും രഞ്ജി പണിക്കര്‍ സംവിധാനം ചെയ്തിരുന്നു.