നിങ്ങളൊരു സൂപ്പർ സ്റ്റാറല്ലെ, ഇങ്ങനെ സീൻ ബൈ സീൻ കോപ്പിയടിക്കണോ, സിതാരെ സമീർ പർ ട്രെയ്ലറിന് പിന്നാലെ ആമിർ ഖാനെതിരെ വിമർശനം
ഇപ്പോഴിതാ ഒരു വലിയ ഇടവേളയ്ക്ക് ശേഷം വീണ്ടും സിനിമയില്‍ സജീവമാവുകയാണ് ആമിര്‍ഖാന്‍. പുതിയ സിനിമയായ 'സിതാരെ സമീന്‍ പാര്‍' ട്രെയിലര്‍ കഴിഞ്ഞ ദിവസമാണ് അണിയറപ്രവര്‍ത്തകര്‍ പുറത്തുവിട്ടത്. 2007-ലെ ഹിറ്റ് സിനിമ 'താരെ സമീന്‍ പാര്‍'-ന്റെ സീക്വലായി പ്രഖ്യാപിച്ച ഈ ചിത്രത്തില്‍ ആമിര്‍ ഖാനും ജെനേലിയ ദേശ്മുഖും ഒപ്പം 10 പുതുമുഖ നടന്മാരുമാണ് അഭിനയിക്കുന്നത്. എന്നാല്‍ സിനിമ പുറത്തിറങ്ങിയത് മുതല്‍ വലിയ വിമര്‍ശനമാണ് ട്രെയ്ലറിന് ലഭിക്കുന്നത്. ചിത്രത്തിന്റെ ട്രെയ്ലര്‍ 2018ല്‍ പുറത്തിറങ്ങിയ സ്പാനിഷ് സിനിമയായ ചാമ്പ്യന്‍സിന്റെ സീന്‍ ബൈ സീന്‍ ആണെന്നാണ് ആരാധകര്‍ പറയുന്നത്.
സ്പാനിഷ് സിനിമയായ ചാമ്പ്യന്‍സിന്റെ അവകാശം ആമിര്‍ഖാന്‍ നേരത്തെ സ്വന്തമാക്കിയിട്ടുള്ളതാണ്. ഡിസെബിലിറ്റിയുള്ള ആളുകള്‍ അടങ്ങിയ ഒരു ബാസ്‌കര്‍ ബോള്‍ ടീമിന്റെ യഥാര്‍ഥ കഥയാണ് സിനിമയുടെ ഇതിവൃത്തം. സിതാരെ സമീന്‍ പറില്‍ സ്പാനിഷ് ചിത്രത്തിന്റെ ഓരോ സീനുകളും അതുപോലെ പകര്‍ത്തുകയാണ് ചെയ്തിട്ടുള്ളതെന്ന് വിമര്‍ശകര്‍ പറയുന്നു.
ഇന്ത്യന്‍ സാഹചര്യത്തിലേക്ക് സിനിമ മാറ്റുമ്പോള്‍ ക്രിക്കറ്റോ ഹോക്കിയോ അങ്ങനെ എന്തെങ്കിലും തിരെഞ്ഞെടുക്കാമായിരുന്നുവെന്ന് ഒരാള്‍ പറയുമ്പോള്‍ ഈ ആമിര്‍ ഖാന്‍ ചെയ്യുന്നതെല്ലാം കോപ്പിയാണെന്ന് ചിലര്‍ പറയുന്നു. അതേസമയം ഇത് ഔദ്യോഗിക റീമെയ്ക്കാണെന്നും ഇന്ത്യക്കാര്‍ സ്പാനിഷ് ചിത്രം കണ്ടിട്ടില്ലാത്തതിനാല്‍ ഇതില്‍ പ്രശ്‌നമില്ലെന്നും ആമിര്‍ ഖാനെ പിന്തുണയ്ക്കുന്നവര്‍ പറയുന്നു. ജൂണ്‍ 20നാണ് സിനിമ തിയേറ്ററുകളില്‍ എത്തുന്നത്.
