സമൂഹമാധ്യമങ്ങളിൽ കുഞ്ഞുമായുള്ള തന്റെ ആദ്യചിത്രം പുറത്തുവിട്ട് കാജൽ അഗർവാൾ. ഏപ്രിലിൽ പ്രസവം കഴിഞ്ഞുവെങ്കിലും മാതൃദിനത്തിലാണ് താരം ആദ്യമായി കുഞ്ഞിന്റെ ചിത്രം പങ്കുവെയ്ക്കുന്നത്. മാതൃദിനത്തിനെ പറ്റി സുന്ദരമായ ഒരു കുറിപ്പും ചിത്രത്തിനൊപ്പം താരം പങ്കുവെച്ചു.
എന്റെ ആദ്യ കുഞ്ഞെ, എനിക്ക് നീ എത്ര വിലപ്പെട്ടതാണെന്ന്, ജീവിതം മുഴുവൻ എത്ര വിലപ്പെട്ടതായിരിക്കുമെന്ന് നിന്നെ അറിയിക്കാൻ ഞാൻ ആഗ്രഹിക്കുന്നു. ആദ്യമായി ഞാൻ കൈകളിൽ ഏറ്റുവാങ്ങിയപ്പോൾ, നിന്റെ കുഞ്ഞുവിരലിന്റെ സ്പർശനം അറിഞ്ഞപ്പോൾ നിന്റെ നനുത്ത ശ്വാസം അനുഭവിച്ചപ്പോൾ നിന്റെ സുന്ദരമായ കണ്ണുകൾ കണ്ടപ്പോൾ ആയുഷ്‌കാ‌ലം വരെ നീയുമായി സ്നേഹത്തിലാകുമെന്ന് ഞാൻ തിരിച്ചറിയുന്നു.
വരുന്ന കാലങ്ങളിൽ ഞാൻ എന്റെ കഴിവ് വെച്ച് ഒരുപാട് കാര്യങ്ങൾ നിന്നെ പഠിപ്പിക്കാൻ ശ്രമിച്ചേക്കാം, പക്ഷേ ഇപ്പോൾ തന്നെ ഒരു അമ്മയായിരിക്കുക എന്ന അനുഭവമെന്നത് ഒത്തിരി തവണ നീയെന്നെ പഠിപ്പിച്ച് കഴിഞ്ഞു. എങ്ങനെ നിസ്വാർഥയാകാമെന്ന്, നിർമലമായ സ്നേഹം എന്താണെന്ന് നീ എന്നെ പഠിപ്പിച്ചു. എന്റെ ശരീരത്തിന് പുറത്തും ഒരു ഹൃദയം ഉണ്ടാകാമെന്ന് നീയെന്നെ പഠിപ്പിച്ചു.
എനിക്ക് ഈ അനുഭവങ്ങളെല്ലാം ആദ്യമായി സമ്മാനിച്ചതിന് ഞാൻ നിന്നോട് നന്ദി പറയുന്നു. മറ്റാർക്കും ഈ നിമിഷങ്ങൾ എനിക്ക് സമ്മാനിക്കാൻ കഴിയുമായിരുന്നില്ല. ദൈവം ആ അവസരത്തിനായി നിന്നെയാണ് തിരെഞ്ഞെടുത്തത്. എന്റെ പ്രിയപ്പെട്ട രാജകുമാരാ.. ഇൻസ്റ്റഗ്രാമിൽ പങ്കുവെച്ച ചിത്രത്തിനൊപ്പം താരം കുറിച്ചു.