ഒന്നിച്ചിരുന്നുള്ള പഠനവും സ്ത്രീകൾ കായികവിനോദത്തിൽ ഏർപ്പെടുന്നതിനും വിലക്കേർപ്പെടുത്തിയ താലിബാനിൽ നിന്നും രാജ്യത്തെ വനിതാ ഫുട്ബോൾ ടീം അംഗങ്ങൾ പോർച്ചുഗലിൽ സുരക്ഷിതരായി എത്തിയെന്ന വാർത്തകളാണ് ഇപ്പോൾ പുറത്തുവരുന്നത്.ഓപ്പറേഷൻ സോക്കർ ബോൾസ്'എന്ന് പേരിട്ട മുപ്പത്തിയഞ്ചോളം ദിവസം നീണ്ടുനിന്ന രക്ഷാദൌത്യത്തിനൊടുവിലാണ് അവരെല്ലാവരും പോര്‍ച്ചുഗല്ലില്‍ എത്തിചേര്‍ന്നത്.
വനിതാ ഫുട്ബോള്‍ താരങ്ങളെ പോര്‍ച്ചുഗല്ലില്ലെത്തിക്കുന്നത് വരെ ഫർഖുണ്ട മുഹ്‌താജ് കളിക്കാരുമായി നിരന്തരം ബന്ധം പുലർത്തിയിരുന്നു. കളിക്കാരും അവരുടെ കുടുംബാംഗങ്ങളും കുഞ്ഞുങ്ങളും ഉള്‍പ്പെടെയുള്ളവരാണ് അഫ്‌ഗാനിൽ നിന്നും പോർച്ചുഗലിലെത്തിയത്. സ്ത്രീകൾക്ക് അവർക്ക് ഇഷ്ടമുള്ള കായിക വിനോദങ്ങൾ കളിക്കാനാകുമെന്ന് ഉറപ്പുവരുത്താനായിരുന്നു രക്ഷാദൗത്യമെന്ന് മുഹ്‌താജ് പറഞ്ഞു.
പോര്‍ച്ചുഗല്ലില്‍ വനിതാ ടീമംഗങ്ങള്‍ എത്തിച്ചേരുമ്പോള്‍ അവരെ സ്വീകരിക്കാനായി ഫർഖുണ്ട മുഹ്തജും അവിടെ എത്തിയിരുന്നു. പലർക്കും ആ നിമിഷത്തിൽ കരച്ചിലടക്കാനിയില്ല. പലരും തങ്ങൾ സ്വാതന്ത്രത്തിലേക്കാണ് കാലെടുത്ത് വെയ്ക്കുന്നതെന്ന് അഭിപ്രായപ്പെട്ടു. അതേസമയം ജനിച്ച് വളർന്ന അഫ്‌ഗാനിസ്ഥാനിലേക്ക് തിരികെ പോകാൻ സാധിക്കില്ല എന്നതിൽ നിരാശയുണ്ടെന്നും ചിലർ പ്രതികരിച്ചു.
