ബൈക്കില്‍ ഒരുമിച്ചു സഞ്ചരിച്ചതിന്റെ പേരില്‍ യുവാവിനെയും യുവതിയേയും വിവാഹം കഴിപ്പിക്കാന്‍ സദാചാര പൊലീസിന്റെ ശ്രമം. ഗുവാഹാട്ടിയിലെ ഫുഖുര്‍പുര്‍ ജില്ലയില്‍ കഴിഞ്ഞ ചൊവ്വാഴ്‌ച രാവിലെയാണ് സംഭവം. കേസെടുത്ത പൊലീസ് രണ്ടു പേരെ അറസ്‌റ്റ് ചെയ്‌തു.
ബൈക്കില്‍ എത്തിയ യുവാവിനേയും യുവതിയേയും ജനക്കുട്ടം തടഞ്ഞുവയ്‌ക്കുകയും ചോദ്യം ചെയ്യുകയുമായിരുന്നു. ഇതിനിടെ ചിലര്‍ ഇരുവരെയും ക്രൂരമായി മര്‍ദ്ദിക്കുകയും ചെയ്‌തു.
മര്‍ദ്ദനത്തിനു ശേഷം ഗ്രാമവാസികള്‍ നാട്ടുകൂട്ടം വിളിച്ചു ചേര്‍ക്കുകയും ഇരുവരോടും വിവാഹം കഴിക്കാന്‍ ആവശ്യപ്പെടുകയും ചെയ്‌തു.
മര്‍ദ്ദനത്തില്‍ പരിക്കേറ്റ യുവതിയും യുവാവും പരാതി നല്‍കാന്‍ തയ്യാറായിട്ടില്ലെങ്കിലും പൊലീസ് സ്വമേധയാ കേസെടുക്കുകയായിരുന്നു. അന്യായമായി തടവിലാക്കല്‍, സ്ത്രീത്വത്തെ അപമാനിക്കല്‍ തുടങ്ങിയ വകുപ്പുകളാണ് അറസ്‌ടിലായ ഇരുവര്‍ക്കും മേല്‍ ചുമത്തിയത്.