പ്രധാനമന്ത്രി നരേന്ദ്ര മോദിയുടെ ഊര്‍ജ്ജസ്വലതയ്‌ക്ക് കാരണം കൂള്‍ വിഭവങ്ങള്‍ ആഹാരത്തില്‍ കൂടുതലായി ഉള്‍പ്പെടുത്തുന്നതുകൊണ്ടാണെന്ന് റിപ്പോര്‍ട്ട്. ഹിമാചല്‍ പ്രദേശില്‍ ഉണ്ടാകുന്ന ഒരു പ്രത്യേക തരത്തിലുള്ള കൂണുകളാണ് മോദിയുടെ ആരോഗ്യത്തിനും ഉന്മേഷത്തിനും കാരണമെന്നാണ് ഡെയ്‌ലി ഭാസ്‌കര്‍ റിപ്പോര്‍ട്ട് ചെയ്യുന്നത്.
ഹിമാചല്‍ പ്രദേശില്‍ നിന്ന് എത്തിക്കുന്ന ഈ കൂണുകളാണ് പ്രധാനമന്ത്രിയുടെ ഭക്ഷണത്തില്‍ പ്രധാനമായും ഉള്‍പ്പെടുത്തിയിരിക്കുന്നത്. ഈ കൂണുകള്‍ കൊണ്ട് ഉണ്ടാക്കുന്ന പല തരത്തിലുള്ള വിഭവങ്ങളും മോദിയുടെ ഇഷ്‌ട ഭക്ഷണമാണെന്നും റിപ്പോര്‍ട്ടുണ്ട്.
ബിജെപിയുടെ ദേശിയ സെക്രട്ടറിയായി ഹിമാചല്‍ പ്രദേശില്‍ മോദി പ്രവര്‍ത്തിക്കുന്ന കാലത്താണ് മോദി ഈ കൂണ്‍ ഭക്ഷണത്തിലുള്‍പ്പെടുത്തിയത്. ഗുജറാത്ത് മുഖ്യമന്ത്രിയായിരിക്കെ അദ്ദേഹം ഒരിക്കല്‍ ഈ കാര്യം വ്യക്തമാക്കിയിട്ടുമുണ്ട്.
ഹിമാചല്‍ പ്രദേശിലെ ഗ്രാമീണരുടെ പ്രധാന വരുമാനമാര്‍ഗങ്ങളില്‍ ഒന്നാണ് ഈ കൂണുകള്‍. മാര്‍ച്ച് മുതല്‍ മെയ് വരെയാണ് കൂണുകള്‍ സംഭരിക്കുന്നത്. ഇത് ഉണക്കിയാണ് വില്‍പ്പന നടത്തുന്നത്.