‘അതിക്രമങ്ങള്‍ ഇല്ലാതാക്കാന്‍ പെണ്‍കുട്ടികൾ ആണ്‍സുഹൃത്തുക്കളെ ഒഴിവാക്കണം’: ഉപദേശവുമായി ബിജെപി എംഎൽഎ
പെണ്‍കുട്ടികൾ ആണ്‍സുഹൃത്തുക്കളെ ഒഴിവാക്കണമെന്ന വിവാദ പരാമർശവുമായി ബിജെപി എംഎൽഎ. മദ്ധ്യപ്രദേശിലെ ഗുണയിൽ നിന്നുള്ള എംഎൽഎ പന്നലാൽ ശാക്യയയാണ് വിവാദ ഉപദേശവുമായി രംഗത്തു വന്നത്.
“ആൺകുട്ടികളെ സുഹൃത്തുക്കളാക്കാതിരുന്നാൽ പെൺകുട്ടികൾ സുരക്ഷിതരായിരിക്കും. പെൺകുട്ടികൾ ആൺസുഹൃത്തുക്കളെ എന്തിനാണ് ഉണ്ടാക്കുന്നത്. ഇത് ഒഴിവാക്കിയാൽ അവർക്കെതിരെ നടക്കുന്ന എല്ലാ അതിക്രമങ്ങളും അവസാനിക്കു”മെന്നും ഗുണ സർക്കാർ കോളജിൽ ശനിയാഴ്ച നടന്ന പരിപാടിയിൽ പങ്കെടുത്തു സംസാരിക്കുകയായിരുന്നു ശാക്യ പറഞ്ഞു.
പെണ്‍സുഹൃത്തുക്കളെ ഉണ്ടാക്കുന്ന പാശ്ചാത്യൻ സംസ്കാരം ആണ്‍കുട്ടികൾ സ്വീകരിക്കരുതെന്നും എംഎൽഎ ആവശ്യപ്പെട്ടു.
രാജ്യാന്തര വനിതാ ദിനം ആചരിക്കുന്നത് വിദേശത്തെ പാരമ്പര്യമാണ്. ഇന്ത്യൻ തത്വശാസ്ത്രം അനുസരിച്ച് സ്ത്രീകളെ ഉയർന്ന നിലയിലാണ് നാം കണക്കാക്കുന്നത്. വർഷത്തിൽ നാല് തവണയെങ്കിലും നമ്മൾ വനിതാദിനം ആഘോഷിക്കുകയും അവരെ ആരാധിക്കുകയും ചെയ്യുന്നുണ്ടെന്നും ശാക്യ പ്രസംഗത്തില്‍ പറഞ്ഞു.
