പ്രതിരോധവകുപ്പിന് 2,03,674 കോടി രൂപ പൊതുബജറ്റില്‍ അനുവദിച്ചു. കൂടുതല്‍ തുക ആവശ്യം വന്നാല്‍ അത് അനുവദിക്കുമെന്നും ധനമന്ത്രി പി ചിദംബരം പറഞ്ഞു.
ആണവോര്‍ജ്ജ വകുപ്പിന് 6,800 കോടി രൂപ അനുവദിച്ചു. ശാസ്ത്ര-സാങ്കേതിക വകുപ്പിന് 6,274 കോടി രൂപയും അനുവദിച്ചതായി ചിദംബരം അറിയിച്ചു.
പതിനായിരത്തിലധം ജനസംഖ്യയുള്ള രാജ്യത്തെ എല്ലാ പട്ടണങ്ങളിലും എല്‍ഐസി ഓഫീസുകള്‍ സ്ഥാപിക്കും. ഗുജറാത്തിലും മഹാരാഷ്ട്രയിലും സ്മാര്‍ട്ട് ഇന്‍ഡസ്ട്രിയല്‍ സിറ്റി സ്ഥാപിക്കും. കിഴക്കന്‍ സംസ്ഥാനങ്ങളില്‍ ഹരിതവിപ്ലവത്തിന് 1000 കോടി രൂപ അനുവദിച്ചു. നീര്‍ത്തട പദ്ധതിക്ക് 5387 കോടി രൂപ അനുവദിച്ചിട്ടുണ്ട്. കാര്‍ഷിക ഗവേഷണത്തിന് 3415 കോടി രൂപ അനുവദിച്ചു. കേര കര്‍ഷകര്‍ക്ക് 75 കോടി രൂപ അനുവദിച്ചു.
അടിസ്ഥാന സൌകര്യ വികസനത്തിന് ബജറ്റില്‍ ഊന്നല്‍ നല്‍കുന്നുണ്ട്. ഇതിനായും തുക മാറ്റിവച്ചു. ഭക്‍ഷ്യ സുരക്ഷയ്ക്ക് 10000 കോടി രൂപ അനുവദിച്ചു. പിന്നാക്ക, ആദിവാസി വിഭാഗങ്ങളിലെ വിദ്യാര്‍ത്ഥികള്‍ക്ക് സ്കോളര്‍ഷിപ്പിന് 5284 കോടി രൂപ അനുവദിച്ചു.
ന്യൂനപക്ഷ ക്ഷേമത്തിന് 3000 കോടി രൂപ അനുവദിച്ചിട്ടുണ്ട്. ഭവനവായ്പയ്ക്ക് നികുതിയിളവ് നല്‍കും. നികുതിയിളവിനുള്ള പരിധി ഒന്നര ലക്ഷത്തില്‍ നിന്ന് രണ്ടര ലക്ഷം രൂപയാക്കിയിട്ടുണ്ട്.