അല്‍ഫോന്‍സ് പുത്രന്‍ സംവിധാനം ചെയ്ത 'പ്രേമം' ഇന്റര്‍നെറ്റില്‍ പ്രചരിച്ചതിന്റെ പേരില്‍ വ്യാഴാഴ്ച അടച്ചിട്ട എ ക്ലാസ് തീയേറ്ററുകള്‍ വെള്ളിയാഴ്ചയും സമരം തുടരുന്നു. ഇന്ത്യന്‍ സിനിമയിലെ ഏറ്റവും മുതല്‍ മുടക്കുള്ള മൊഴിമാറ്റ ചിത്രം 'ബാഹുബലി' വൈഡ് റിലീസിംഗ് നടത്താന്‍ പ്രൊഡ്യൂസേഴ്സ് അസോസിയേഷനും ഡിസ്ട്രിബ്യൂട്ടേഴ്സ് അസോസിയേഷനും തീരുമാനിച്ചതിനെതിരേയാണു 350 ഓളം എ ക്ലാസ് തീയേറ്ററുകള്‍ വെള്ളിയാഴ്ചയും അടച്ചിടുന്നത്.
എ ക്ലാസ് തീയേറ്ററുകള്‍ സമരം പ്രഖ്യാപിച്ചതോടെ നഗരങ്ങളിലെ മള്‍ട്ടിപ്ലക്സുകളിലും എക്സിബിറ്റേഴ്സ് ഫെഡറേഷനില്‍ അംഗമല്ലാത്ത ചില എ ക്ലാസ് തീയേറ്ററുകളിലും മാത്രമേ വെള്ളിയാഴ്ച റിലീസുകള്‍ നടക്കൂ എന്നുറപ്പായി. അടുത്തയാഴ്ച റംസാന്‍ ചിത്രങ്ങള്‍ കൂടി എത്തുന്നതിനാല്‍ സിനിമാ മേഖലയിലെ തമ്മിലടി വീണ്ടും ചര്‍ച്ചയായിരിക്കുകയാണ്. വെള്ളിയാഴ്ച കൊണ്ടു സമരം അവസാനിക്കുമോ അതോ അനിശ്ചിത കാലത്തേക്കു തീയേറ്ററുകള്‍ അടച്ചിടുമോ എന്ന കാര്യം വ്യക്തമല്ല.