മാളികപ്പുറത്ത് ഇന്നലെ ഉണ്ടായ അപകടത്തിന് കാരണം പൊലീസിന്റെ വീഴ്ചയല്ലെന്ന് ദേവസ്വംമന്ത്രി കടകംപള്ളി സുരേന്ദ്രന്‍. അടിയന്തര ദേവസ്വം ബോര്‍ഡ് യോഗം ചേര്‍ന്നതിനുശേഷമായിരുന്നു മന്ത്രിയും ദേവസ്വം ബോര്‍ഡ് പ്രസിഡന്റും പൊലീസിനെ ന്യായീകരിച്ച് രൊഗത്തെത്തിയത്. മകരവിളക്കിനോടനുബന്ധിച്ച് ശബരിമലയിലെ സുരക്ഷ ശക്തമാക്കിയതായും മന്ത്രി വ്യക്തമാക്കി.
രാപകല്‍ ഊണും ഉറക്കവുമില്ലാതെ പ്രവര്‍ത്തിക്കുന്ന പൊലീസുകാരുടെ സേവനങ്ങളെ എന്തിനാണ് തള്ളിപ്പറയുന്നതെന്നും മന്ത്രി മാധ്യമ പ്രവര്‍ത്തകരോട് ചോദിച്ചു. അവരുടെ പ്രവര്‍ത്തനങ്ങളെ വിലകുറച്ച് കാണരുതെന്നും മന്ത്രി പറഞ്ഞു. ഇക്കാര്യത്തില്‍ പൊലീസിന് വീഴ്ച പറ്റിയിട്ടില്ലെന്ന് അറിയിച്ച് ഡിജിപിയും രംഗത്തെത്തിയിരുന്നു. ഇതിന് പിന്നാലെയാണ് ദേവസ്വംമന്ത്രിയും പൊലീസിനെ ന്യായീകരിച്ച് എത്തിയത്.
