സെക്രട്ടേറിയറ്റിനു സമീപം ബിജെപി സമരപ്പന്തലിനു മുമ്പിൽ തീകൊളുത്തി ആത്മഹത്യാശ്രമം നടത്തിയയാൾ മരിച്ചു. മുട്ടട സ്വദേശി വേണു ഗോപാലന്‍ നായരാണ് (49) മരിച്ചത്. തൊണ്ണൂറ് ശതമാനം പൊള്ളലേറ്റതാണ് മരണകാരണം.
സെക്രട്ടറിയേറ്റിന് മുന്നിൽ ബിജെപി നേതാവ് സികെ പത്മനാഭൻ നിരാഹാര സമരം നടത്തുന്ന സമരപ്പന്തലിന് മുന്നിലായിരുന്നു പുലർച്ചെ രണ്ടു മണിയോടെ വേണുഗോപാലൻ നായർ ആത്മഹത്യാശ്രമം നടത്തിയത്.
സമരപന്തലിന്റെ എതിർ ഭാഗത്തു റോഡരികിൽനിന്നു ശരീരത്തിൽ പെട്രോൾ ഒഴിച്ചു തീ കത്തിച്ചു സമരപന്തലിനു സമീപത്തേക്ക് ഓടി വരികയായിരുന്നു. ഉടൻ നേതാക്കളും പ്രവർത്തകരും ചേർന്ന് പന്തലിലുണ്ടായിരുന്ന വെള്ളം ഉപയോഗിച്ച് തീകെടുത്തി.
ശരീരമാസകലം പൊള്ളലേറ്റ വേണുഗോപാലൻ നായരെ ആശുപത്രിയില്‍ എത്തിച്ചെങ്കിലും പൊള്ളല്‍ ഗുരുതരമായിരുന്നു. ഇയാള്‍ ബിജെപി അനുഭാവിയാണെന്നു ബന്ധുക്കളും പൊലീസ് ഉദ്യോഗസ്ഥരും പറഞ്ഞു.
അയ്യപ്പനുവേണ്ടി തനിക്ക് ഇത്രയുമേ ചെയ്യാൻ കഴിയൂ എന്ന് വിളിച്ചു പറഞ്ഞാണ് തീ കൊളുത്തിയത്. ദേഹത്ത് തീ കൊളുത്തുന്നതിനിടെ ശരണം വിളിക്കുകയും ചെയ്തു. ശരീരത്ത് പടന്ന തീയുമായി ഇയാൾ സമരപ്പന്തലിനുള്ളിൽ കയറിയെങ്കിൽ സ്ഥിതി മറ്റൊന്നാകുമായിരുന്നു.
സികെ പദ്മനാഭനോടൊപ്പം കാട്ടാക്കടയിൽ നിന്നും നഗരത്തിൽ നിന്നുമുള്ള 70 ഓളം പ്രവർത്തകരും സമര പന്തലിലുണ്ടായിരുന്നു.