സംസ്ഥാനത്ത് വൈദ്യുതി നിരക്ക് വര്‍ദ്ധിപ്പിച്ചു; ഉയര്‍ന്നത് യൂണിറ്റിന് 16 പൈസ

സംസ്ഥാനത്ത് വൈദ്യുതി നിരക്ക് വര്‍ദ്ധിപ്പിച്ചു. ഉയര്‍ന്നത് യൂണിറ്റിന് 16 പൈസയാണ്. പുതിയനിരക്ക് വ്യാഴാഴ്ച മുതല്‍ പ്രാബല്യത്തില്‍ വരും. കെഎസ്ഇബി 37 പൈസയുടെ വര്‍ദ്ധനവാണ് ആവശ്യപ്പെട്ടിരുന്നത്. അതേസമയം 40 യൂണിറ്റ് വരെ ഉപയോഗിക്കുന്നവരെ നിരക്ക് വര്‍ദ്ധന ബാധിക്കില്ലെന്ന് കെഎസ്ഇബി അറിയിച്ചിട്ടുണ്ട്.

പിണറായി സര്‍ക്കാര്‍ അധികാരത്തില്‍ വന്നശേഷം വൈദ്യുതി നിരക്ക് വര്‍ധിപ്പിക്കുന്നത് ഇത് അഞ്ചാം തവണയാണ്. 4 ഘട്ടങ്ങളിലായി ഇതുവരെ യൂണിറ്റിന് വര്‍ധിപ്പിച്ചത് 134.63 പൈസയാണ്. 2018ല്‍ യൂണിറ്റിന് 20 പൈസയും 2019ല്‍ 40 പൈസയും 2022ല്‍ 40.63 പൈസയും 2023ല്‍ 24 പൈസയുമാണ് വര്‍ധിപ്പിച്ചിരുന്നത്. ഇത്തവണ വൈദ്യുതി ബോര്‍ഡ് വര്‍ധിപ്പിക്കുന്നത് 4.45 ശതമാനമാണ്.

കൂടിയ നിരക്കില്‍ വൈദ്യുതി വാങ്ങിയതുമൂലമാണ് വൈദ്യുതി നിരക്ക് വര്‍ധിപ്പിക്കേണ്ടി വന്നത്. ആഭ്യന്തര ഉല്‍പ്പാദനം കുറഞ്ഞതാണ് മറ്റൊരു കാരണം. സംസ്ഥാനത്തിന് ആവശ്യമുള്ള 70% വൈദ്യുതിയും പുറത്തുനിന്നാണ് വാങ്ങുന്നത്.