കോഴിക്കോട് ജില്ലാ ജയിലില്‍ പാര്‍പ്പിച്ചിരിക്കുന്ന പ്രതിയായ ജോളി ജയിലില്‍ നിന്നും അനധികൃതമായി മൊബൈല്‍ ഫോണ്‍ ഉപയോഗിക്കുന്നുവെന്ന വാര്‍ത്ത ദൃശ്യമാധ്യമങ്ങളില്‍ പ്രചരിക്കുന്നതുമായി ബന്ധപ്പെട്ട് വിശദീകരണവുമായി എത്തിയിരിക്കുകയാണ് ജയില്‍ ഡിജിപി ഋഷിരാജ് സിംഗ്. കൊവിഡിന്റെ പശ്ചാത്തലത്തില്‍ സുപ്രീം കോടതിയുടെയും ഹൈക്കോടതിയുടെയും ഉത്തരവുകളുടെ അടിസ്ഥാനത്തില്‍ തടവുകാര്‍ക്ക് അവരുടെ ബന്ധുക്കളുമായി നേരിട്ട് സംസാരിക്കുന്നതിനു പകരം വീഡിയോ കോണ്‍ഫറന്‍സിലൂടെയോ ഫോണ്‍ വഴിയോ ബന്ധപ്പെടാം. ഇതുസംബന്ധിച്ച് ഫോണുപയോഗിക്കുന്നതിന്റെ ആവൃത്തിയും സമയവും ഇളവ് ചെയ്തിരുന്നു. തടവുകാരുടെ മന:സംഘര്‍ഷം ഒഴിവാക്കാനായി പൊതുവില്‍ എടുത്ത നടപടിയാണിത്.
കേരളത്തിലെ മിക്കവാറും എല്ലാ ജയിലുകളിലും തടവുകാര്‍ക്ക് അവരുടെ ബന്ധുക്കളുമായിട്ടും അഭിഭാഷകരുമായിട്ടും ബന്ധപ്പെടാന്‍ ഫോണ്‍ സൗകര്യം ഏര്‍പ്പെടുത്തിയിരിക്കുന്നത് അലന്‍ ഗ്രൂപ്പ് എന്ന കമ്പനിയുടെ സ്മാര്‍ട്ട് പേ ഫോണ്‍ കാര്‍ഡ് എന്ന സംവിധാനം ഉപയോഗിച്ചാണ്. മൊബൈല്‍ ഫോണിന് തുല്യമായ 10 ഡിജിറ്റ് നമ്പര്‍ ഫോണാണത്. മാധ്യമങ്ങളില്‍ കാണുന്ന നമ്പര്‍ കോഴിക്കോട് ജില്ലാ ജയിലിലെ ഫീമെയില്‍ ബ്‌ളോക്കില്‍ വനിതാ തടവുകാര്‍ക്ക് ഉപയോഗിക്കാന്‍ സ്ഥാപിച്ചിരിക്കുന്ന ഫോണിന്റെ നമ്പറാണെന്നും ഡിജിപി വ്യക്തമാക്കി.
