കൊച്ചി മെട്രോയുടെ രണ്ടാം ഘട്ട പരീക്ഷണ ഓട്ടം ഇന്ന് നടക്കും. മുട്ടം മുതല്‍ ഇടപ്പള്ളി വരെ ആറു കിലോമീറ്റര്‍ ദൂരത്താണ് രണ്ടാംഘട്ട പരീക്ഷണ ഓട്ടം നടത്തുന്നത്. മൂന്നു തവണ മെട്രോ ഓടിക്കുമെന്ന് അധികൃതര്‍ അറിയിച്ചു. ആദ്യ മണിക്കൂറില്‍ 10 കിലോമീറ്ററും രണ്ടാമത്തെ ഓട്ടത്തില്‍ 20 കിലോമീറ്ററും മൂന്നാമത് മണിക്കൂറില്‍ 30 കിലോമീറ്ററും വേഗത്തില്‍ മെട്രോയെത്തുമെന്നും അധികൃതര്‍ പറഞ്ഞു. രാവിലെ 9.30നാണ് പരീക്ഷണ ഓട്ടത്തിന് തുടക്കമാകുക.
പരീക്ഷണ ഓട്ടത്തിന് മുന്നോടിയായി മെട്രോ ട്രാക്കുകള്‍ ക്രമീകരിക്കുന്ന ജോലികള്‍ ഇന്നലെ പൂര്‍ത്തിയായി. നിര്‍മാണ സാമഗ്രികള്‍ എല്ലാം ട്രാക്കില്‍നിന്നു മാറ്റിയശേഷം സ്ട്രക്ച്ചറല്‍ ഗേജ് ഉപയോഗിച്ചു പരിശോധിക്കുകയും ചെയ്തു. ഡ്രൈവര്‍ ഉള്‍പ്പെടെയുള്ള സാങ്കേതിക വിദഗ്ധര്‍ മാത്രമായിരിക്കും ട്രെയിനിലുണ്ടാവുക.
കഴിഞ്ഞ ഫെബ്രുവരി 27നായിരുന്നു ട്രാക്കിലൂടെയുള്ള ആദ്യ പരീക്ഷണ ഓട്ടം. മണിക്കൂറില്‍ അഞ്ച് മുതല്‍ എട്ട് കിലോമീറ്റര്‍ വേഗത്തില്‍ മുട്ടം യാര്‍ഡില്‍നിന്നു കളമശേരി വരെയായിരുന്നു അന്നത്തെ യാത്ര. ചില സോഫ്റ്റ്‌വേയര്‍ സംബന്ധമായ തകരാറുകള്‍ അന്ന് കണ്ടെത്തിയിരുന്നു.
അടുത്ത പരീക്ഷണ ഓട്ടം മേയ് മാസത്തിലാണ്. അത് മുട്ടം മുതല്‍ പാലാരിവട്ടം വരെയായിരിക്കും. ജൂലൈയില്‍ മഹാരാജാസ് ഗ്രൗണ്ട് വരെയും പരീക്ഷണ ഓട്ടം നീട്ടുമെന്നും അധികൃതര്‍ വ്യക്തമാക്കി.