ധനമന്ത്രി കെ എം മാണി കോഴ വാങ്ങിയിട്ടില്ലെന്ന് വീണ്ടും മുഖ്യമന്ത്രി ഉമ്മന്‍ ചാണ്ടി. ബാര്‍ കോഴക്കേസില്‍ കോടതിവിധി അംഗീകരിക്കുന്നു. എന്നാല്‍, വിജിലന്‍സ് കോടതി വിധി അവസാന വാക്കല്ലെന്നും മുഖ്യമന്ത്രി പറഞ്ഞു. ഉദ്യോഗസ്ഥന്മാരെ പരിധിക്കപ്പുറം പോകാന്‍ അനുവദിക്കില്ലെന്നും മുഖ്യമന്ത്രി വ്യക്തമാക്കി.
വര്‍ഷങ്ങള്‍ക്ക് ശേഷം വിശ്വനാഥനെ കോടതി കുറ്റവിമുക്തനാക്കി. ആ സമയത്ത് രാജി സ്വീകരിച്ചതിനെതിരെ ഒന്നും ചെയ്യാന്‍ കഴിഞ്ഞില്ല. പാമോലിന്‍ കേസിലും ടൈറ്റാനിയം കേസിലും സമാനസ്ഥിതി ആയിരുന്നു. ഇക്കാരണങ്ങളാല്‍, മാണി രാജി വെക്കണമോ വേണ്ടയോ എന്ന് പരിശോധനയ്ക്ക് ശേഷം മാത്രമേ തീരുമാനിക്കുകയുള്ളൂവെന്നും അദ്ദേഹം പറഞ്ഞു.
