പ്രണയപ്പക; പൊള്ളലേറ്റ വിദ്യാര്‍ഥിനി അതീവ ഗുരുതരാവസ്ഥയില്‍ - പെണ്‍കുട്ടി വെന്റിലേറ്ററിലെന്ന് റിപ്പോര്‍ട്ട്

പ്രണയാഭ്യർഥന നിരസിച്ചതിനു യുവാവ് കുത്തിയ ശേഷം തീകൊളുത്തി കൊല്ലാന്‍ ശ്രമിച്ച പെണ്‍കുട്ടിയുടെ നില അതീവ ഗുരുതരം. അറുപത് ശതമാനത്തിലേറെ പൊള്ളലേറ്റ പെൺകുട്ടി കൊച്ചിയിലെ സ്വകാര്യ ആശുപത്രിയിൽ ചികിൽസയിലാണ്. ശരീരമാസകലം പൊള്ളലേറ്റതിന് പുറമേ വയറ്റില്‍ ആഴത്തില്‍ കുത്തേറ്റിട്ടുമുണ്ട്.

വിദഗ്ധ ചികിൽസ ലഭ്യമാക്കുന്നതിനാണ് പെൺകുട്ടിയെ കൊച്ചിയിലെ സ്വകാര്യ ആശുപത്രിയിലേക്കു മാറ്റിയത്. വെന്റിലേറ്ററിൽ അബോധാവസ്ഥയിൽ തുടരുകയാണ് പെൺകുട്ടി.

സംഭവത്തില്‍ കടപ്ര കുമ്പനാട് സ്വദേശി അജിന്‍ റെജി മാത്യുവിനെ പൊലീസ് കൂടുതല്‍ ചോദ്യം ചെയ്തു വരികയാണ്. മൂന്നുവർഷമായി തുടരുന്ന പ്രണയത്തിൽനിന്ന് പെൺകുട്ടി പിൻമാറിയതാണ് ആക്രമണത്തിന് കാരണമെന്ന് അജിൻ പൊലീസിനോട് ആവർത്തിച്ചു.

തിരുവല്ല നഗരത്തിലെ ചിലങ്ക ജംഗ്ഷനില്‍ ഇന്നലെ രാവിലെ ഒമ്പതര മണിയോടെയാണ് സംഭവം. ബസ്‌സ്‌റ്റോപ്പിൽ കാത്തിരുന്ന പ്രതി പെട്രോൾ വിദ്യാർഥിനിയുടെ ശരീരത്ത് ഒഴിക്കുകയും തീ കൊളുത്തുകയുമായിരുന്നു.

നാട്ടുകാരാണ് തീയണച്ച് പെൺകുട്ടിയെ ആശുപത്രിയിലെത്തിച്ചത്. അജിനെ നാട്ടുകാർ പിടികൂടി പൊലീസിൽ ഏൽപ്പിക്കുകയായിരുന്നു.

പ്ലസ് ടുവിന് പഠിക്കുമ്പോള്‍ മുതല്‍ അജിന് പെണ്‍കുട്ടിയോട് പ്രണയമുണ്ടായിരുന്നു. യുവാവ് വിവാഹഭ്യര്‍ത്ഥന നടത്തിയെങ്കിലും പെണ്‍കുട്ടി ഇതെല്ലാം നിരസിച്ചു. ഇതോടെയാണ് യുവാവ് പെണ്‍കുട്ടിയുടെ ദേഹത്തേക്ക് പെട്രോള്‍ ഒഴിച്ചശേഷം തീ കൊളുത്തിയത്.