അപകടം നടക്കുന്ന സമയത്ത് കാര്‍ ഓടിച്ചിരുന്നത് ബാലഭാസ്കര് ആണെന്ന് ഡ്രൈവര്‍ അര്‍ജുന്‍റെ മൊഴി. ബാലഭാസ്കറിന്‍റെ ഭാര്യ ലക്ഷ്മിയും മകള്‍ തേജസ്വിനിയും മുന്‍‌സീറ്റിലാണ് ഇരുന്നിരുന്നതെന്നും മൊഴി.
തൃശൂര്‍ മുതല്‍ കൊല്ലം വരെ മാത്രമാണ് താന്‍ കാര്‍ ഓടിച്ചതെന്നും അതിന് ശേഷം ബാലഭാസ്കറാണ് ഡ്രൈവ് ചെയ്തിരുന്നതെന്നുമാണ് അര്‍ജുന്‍റെ മൊഴി. പിന്നിലെ സീറ്റില്‍ വിശ്രമിക്കുകയായിരുന്നു താനെന്നും അര്‍ജുന്‍ പറയുന്നു.
കാര്‍ ഓടിച്ചിരുന്നത് അര്‍ജുനാണെന്നും അര്‍ജുന്‍ ഉറങ്ങിപ്പോയതാകാം അപകടകാരണം എന്നുമാണ് നേരത്തേ പൊലീസ് നിഗമനത്തിലെത്തിയിരുന്നത്. എന്നാല്‍ അര്‍ജുന്‍റെ മൊഴിയോടെ ബാലഭാസ്കറാണ് കാര്‍ ഓടിച്ചിരുന്നത് എന്ന് ആദ്യമായി പുറത്തുവരികയാണ്.
കാര്‍ അപകടത്തില്‍ പെട്ടയുടന്‍ തേജസ്വിനിയും ദിവസങ്ങള്‍ക്കകം ബാലഭാസ്കറും മരിച്ചു. ലക്ഷ്മിയുടെ ആരോഗ്യനിലയില്‍ ഇപ്പോള്‍ നല്ല പുരോഗതിയുണ്ട്.