കൊച്ചിയില്‍ യുവനടിയെ തട്ടിക്കൊണ്ടു പോയി ഉപദ്രവിച്ച കേസില്‍ അറസ്‌റ്റിലായ നടന്‍ ദിലീപിനെ രക്ഷിക്കാന്‍ പൊലീസ് സേനയില്‍ നിന്ന് തന്നെ നീക്കം ശക്തമായതായി ആക്ഷേപം. ഒരു വിഭാഗം ഉദ്യോഗസ്ഥര്‍ കേസ് അട്ടിമറിക്കാന്‍ ഇടപെടലുകള്‍ നടത്തുന്നുവെന്ന് വ്യക്തമാക്കി അന്വേഷണ സംഘം മേലുദ്യോഗസ്ഥര്‍ക്ക് റിപ്പോര്‍ട്ട് കൈമാറിയതായിട്ടാണ് വിവരം.
അടുത്ത കാലത്തും ഈ ദിവസങ്ങളിലുമായി പുറത്തുവരുന്ന വാര്‍ത്തകള്‍ അന്വേഷണ ഉദ്യോഗസ്ഥരുടെ പ്രതിച്ഛായ തകര്‍ക്കുന്നതിനും അതുവഴി ദിലീപിന് അനുകൂലമായ തരംഗം ഉണ്ടാക്കുന്നതിനാണെന്നുമാണ് ആക്ഷേപം. പൊലീസ് സേനയ്ക്കുള്ളില്‍ തന്നെയുള്ള ഒരു വിഭാഗമാണ് ഇതിനു പിന്നില്‍ പ്രവര്‍ത്തിക്കുന്നത്.
നടിയെ കാറില്‍ വെച്ച് പള്‍സര്‍ സുനിയും കൂട്ടരും ലൈംഗികമായി ആക്രമിക്കുന്നതിന്റെ ദൃശ്യങ്ങള്‍ മെഡിക്കല്‍ വിദ്യാര്‍ത്ഥിയെ കാണിച്ചുവെന്ന പ്രചാരണവും, ദിലീപിന്റെ ആദ്യ വിവാഹത്തെക്കുറിച്ച് പൊലീസ് അന്വേഷിക്കുന്നുവെന്ന വാര്‍ത്തയും പുറത്തുവന്നതും പ്രചരിപ്പിച്ചതും കേസന്വേഷണം അട്ടിമറിക്കുന്നതിനാണെന്നാണ് റിപ്പോര്‍ട്ട്. ഇതിനു പിന്നില്‍ പ്രവര്‍ത്തിക്കുന്ന ഉദ്യോഗസ്ഥരെ പിടികൂടുന്നതിനായി പ്രത്യേക അന്വേഷണ സംഘം ഇതു സംബന്ധിച്ച ഫോണ്‍ രേഖകള്‍ പരിശോധിച്ച് വരികയാണ്.
നടിയെ തട്ടിക്കൊണ്ടു പോയ സംഭവം ദിലീപിന്റെ ആദ്യ വിവാഹവും തമ്മില്‍ ബന്ധമില്ലാത്ത സ്ഥതിക്ക് ഇതു സംബന്ധിച്ച വാര്‍ത്തകളും റിപ്പോര്‍ട്ടുകളും മാധ്യമങ്ങള്‍ക്ക് ചോര്‍ത്തി നല്‍കപ്പെട്ടതാണെന്നും സൂചനയുണ്ട്. കേസന്വേഷണത്തെ തകര്‍ക്കാനാണ് ആദ്യ വിവാഹ വാര്‍ത്ത പുറത്തുവന്നിരിക്കുന്നത്.
ദിലീപീന്‍ രക്ഷിക്കാന്‍ വേണ്ടിയാണ് പള്‍സര്‍ സുനി ‘മാഡം’ എന്ന വാക്ക് ഉപയോഗിച്ചതെന്നാണ് അന്വേഷണ ഉദ്യോഗസ്ഥരുടെ അനുമാനം. ഈ കഥ പ്രചരിപ്പിച്ച് കേസ് വഴി തെറ്റിച്ചു വിടാനും പൊലീസ് സേനയില്‍ തന്നെ നീക്കം നടക്കുന്നുണ്ടെന്നാണ് പുറത്തുവരുന്ന റിപ്പോര്‍ട്ട്.