കൊച്ചി: മൂന്ന് അൽഖ്വയ്‌ദ തീവ്രവാദികളെ എറണാകുളത്ത് നിന്നും പിടികൂടി. ശനിയാഴ്‌ച്ച പുലർച്ചെ എൻഐഎ നടത്തിയ റെയ്ഡിലാണ് തീവ്രവാദികൾ പിടിയിലായത്. അതേസമയം രാജ്യത്ത് ഒന്നാകെയായി നടത്തിയ വിവിധ റെയ്‌ഡുകളിലായി 9 പേരെ പിടികൂടിയിട്ടുണ്ട്. ആറ് പേരെ ബംഗാളിലെ മൂർഷിദാബാദിൽ നിന്നും മൂന്ന് പേരെ കേരളത്തിലെ എറണാകുളത്ത് നിന്നുമാണ് പിടികൂടിയത്.
മുർഷിദ് ഹസൻ, യാക്കൂബ് ബിശ്വാസ്, മൊഷർഫ് ഹസൻ എന്നിവരാണ് കേരളത്തിൽനിന്നും പിടിയിലായ മൂന്ന് പേർ. പശ്ചിമബംഗാളും കേരളവും കേന്ദ്രീകരിച്ച് പ്രവർത്തിക്കുന്ന ഈ സംഘം ഇന്ത്യയുടെ വിവിധ ഭാഗങ്ങളിലായി ആക്രമണം നടത്താനാണ് പദ്ധതിയിട്ടിരുന്നത്. കെട്ടിട്ടനിർമ്മാണ തൊഴിലാളികൾ എന്ന നിലയിലാണ് കേരളത്തിൽ നിന്നും പിടിയിലായവർ താമസിച്ചിരുന്നത് എന്നാണ് വിവരം. ദില്ലിയിലാണ് ഇതുമായി ബന്ധപ്പെട്ട കേസ് രജിസ്റ്റർ ചെയ്തിരിക്കുന്നത് എന്നതിനാൽ ഇവരെ എൻഐഎയുടെ ദില്ലി യൂണിറ്റിന് കൈമാറിയേക്കും.