പത്തുവയസുകാരന്‍ ബാങ്കില്‍ നിന്നും പത്തുലക്ഷത്തോളം രൂപ മോഷ്ടിച്ചു. മധ്യപ്രദേശിലെ നീമച്ച് ജില്ലയിലാണ് സംഭവം. വെറും 30സെക്കന്റ് കൊണ്ടാണ് ക്യാഷ് കൗണ്ടറില്‍ എത്തി കുട്ടി പണം തട്ടിയെടുത്ത് മുങ്ങിയത്. എന്നാല്‍ ബാങ്കിലെ ജീവനക്കാര്‍ ഇക്കാര്യം അറിഞ്ഞിരുന്നില്ല. സീസി ടിവി ദൃശ്യങ്ങള്‍ പരിശോധിച്ചപ്പോഴാണ് സംഗതി മനസിലായത്. രാവിലെ 11 മണിയോടെ ബാങ്കിലെത്തിയ കുട്ടി ക്യാഷ്യര്‍ മറ്റൊരു റൂമിലേക്ക് പോകുന്ന തക്കം നോക്കിയാണ് കൈയിലുണ്ടായിരുന്ന ബാഗില്‍ പണം നിറച്ച് മുങ്ങിയത്.
കുട്ടിയെ ഇതുവരെ കണ്ടെത്താന്‍ കഴിഞ്ഞിട്ടില്ല. കുട്ടിക്ക് പൊക്കം ഇല്ലാതിരുന്നതിനാലാണ് ബാങ്കിലുണ്ടായിരുന്ന മറ്റുള്ളവര്‍ക്ക് ഇക്കാര്യം അറിയാന്‍ സാധിക്കാത്തത്. കുട്ടിയെ ഉപയോഗിച്ച് പണം തട്ടിയതിന് പിന്നില്‍ വന്‍ സംഘം ഉണ്ടെന്നാണ് പൊലീസ് സംശയിക്കുന്നത്.