ചങ്ങനാശേരി തൃക്കൊടിത്താനത്ത് പിതാവിന്റെ സഹാ‍യത്തോടെ പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയി പീഡിപ്പിച്ചു. തട്ടിക്കൊണ്ടുപോകാന്‍ നേതൃത്വം നല്‍കിയ യുവാവിനും സഹായികളായ അഞ്ചു പേര്‍ക്കുമെതിരേ പൊലീസ് കേസെടുത്തു.
സംഭവത്തിന്‌ ഒത്താശ ചെയ്ത പെണ്‍കുട്ടിയുടെ പിതാവിനെയും രണ്ടാനമ്മയേയും പൊലീസ് ഇതുവരെ പിടികൂടാനായിട്ടില്ല. തൃക്കൊടിത്താനത്തിനടുത്ത് കൊട്ടാങ്ങല്‍ പൊടിപ്പാറ നിയാസ് മന്‍സിലില്‍ നിയാസ് നാസറാണ്(23) പെണ്‍കുട്ടിയെ തട്ടിക്കൊണ്ടു പോയത്.
ഇതിന്‌ ഒത്താശ ചെയ്ത നിയാസിന്‍റെ സുഹൃത്തുക്കളായ പെരുമ്പട്ടി ചിരത്തോലില്‍ കബീര്‍ (25), ചുങ്കപ്പാറ ഉരയ്ക്കാം പാറ ശ്രീജിത്ത് (25) എന്നിവരും പിടിയിലായി. ഇവരെ സഹായിച്ച പെണ്‍കുട്ടിയുടെ പിതാവ് സക്കീര്‍, രണ്ടാനമ്മ എന്നിവര്‍ ഒളിവിലാണ്‌.
സക്കീറിന്റെ ആദ്യ ഭാര്യയിലുണ്ടായ കുട്ടിയെ വിവാഹം ചെയ്യുന്നതിനായി പെണ്ണുകാണിക്കാനെന്ന വ്യാജേന നിയാസ് നാസറുമായി സക്കീര്‍ ആദ്യ ഭാര്യയുടെ വീട്ടിലെത്തി. ആദ്യ ഭാര്യയ്ക്കൊപ്പം കഴിഞ്ഞിരുന്ന പെണ്‍കുട്ടിയെ പിതാവ് സക്കീറിന്റെ ഒത്താശയോടെ നിയാസ് നാസര്‍ തട്ടിക്കൊണ്ടു പോയി. ഇക്കാര്യം കാട്ടി ആദ്യ ഭാര്യ പൊലീസില്‍ പരാതിപ്പെട്ടതനുസരിച്ച് നാസറിനെയും പെണ്‍കുട്ടിയേയും കര്‍ണ്ണാടകയിലെ ഹോസ്ദുര്‍ഗില്‍ നിന്ന് കഴിഞ്ഞ 20 ന്‌ പൊലീസ് പിടികൂടി.
നാസറിനെ ഒന്നാം പ്രതിയായും സക്കീര്‍, രണ്ടാനമ്മ എന്നിവരെ യഥാക്രമം രണ്ടും മൂന്നും പ്രതികളുമായും കേസ് രജിസ്റ്റര്‍ ചെയ്തിട്ടുണ്ട്. അതേ സമയം നാസറിനു കൂട്ടുനിന്ന കബീര്‍, ശ്രീജിത്ത് എന്നിവരെ നാലും അഞ്ചും പ്രതികളായി കോടതിയില്‍ ഹാജരാക്കിയെങ്കിലും ഇവര്‍ക്ക് കോടതി ജാമ്യം നല്‍കി. നാസറിനെ 14 ദിവസത്തേക്ക് കോടതി റിമാന്‍ഡ് ചെയ്തു. സക്കീറിനെയും രണ്ടാം ഭാര്യയേയും പിടികൂടാനുള്ള അന്വേഷണത്തിലാണു പൊലീസ്.