ഫെഡറല്‍ ബാങ്ക് എടി‌എമ്മില്‍ നിന്നും പണം മോഷ്ടിച്ച സെക്യൂരിറ്റി ജീവനക്കാരനെ പൊലീസ് അറസ്റ്റ് ചെയ്തു. സെക്യൂരിറ്റി ജീവനക്കാരനായ ശശികുമാറിനെയാണ് പൊലീസ് അറസ്റ്റ് ചെയ്തത്.
മാള സ്വദേശിയായ ജോണ്‍സന്റെ എടി‌എം കാര്‍ഡ് ബാങ്ക് പരിസരത്ത് വച്ച് നഷ്ടപ്പെട്ടിരുന്നു.കാര്‍ഡിന്റെ കവറില്‍ രഹസ്യകോഡ് നമ്പര്‍ എഴുതിയിരുന്നു. ഈ കാര്‍ഡ് ഉപയോഗിച്ചാണ് ശശികുമാര്‍ പണം അപഹരിച്ചിരുന്നത്.
മൂന്ന് ദിവസങ്ങളായി 15000 രൂപ വീതമാണ് ശശികുമാര്‍ പണം അപഹരിച്ചത്. ഈ മൂന്ന് ദിവസത്തെയും പണം പിന്‍ വലിച്ച മെസേജുകള്‍ ജോണ്‍സനു ലഭിച്ചിരുന്നു. തുടര്‍ന്ന് ജോണ്‍സണ്‍ ബാങ്ക് മാനേജര്‍ക്ക് പരാതി നല്‍കി.
ബാങ്ക് മാനേജര്‍ നടത്തിയ പരിശോധനയിലാണ് ശശികുമാറാണ് പണം അപഹരിച്ചതെന്ന് മനസിലായത്. തുടര്‍ന്ന് ഇയാളെ ജോലിയില്‍ നിന്ന് പിരിച്ച് വിടുകയും പൊലീസില്‍ ഏല്‍പ്പിക്കുകയുമായിരുന്നു.