Dhoni- Kohli: സന്തോഷം കൊണ്ട് കരച്ചിലടക്കാനാവാതെ കോലി, ഒന്നും മിണ്ടാതെ നിശബ്ദനായി മടങ്ങി ധോനി, ഐപിഎല്ലിൽ സിനിമയെ വെല്ലുന്ന രംഗങ്ങൾ
മത്സരത്തില്‍ 13 പന്തില്‍ 25 റണ്‍സുമായി ധോനി ചെന്നൈക്കായി പൊരുതിയെങ്കിലും ടീമിനെ വിജയത്തിലേക്കെത്തിക്കാനായില്ല. അതേസമയം ടൂര്‍ണമെന്റില്‍ നിന്നും ഏകദേശം പുറത്തായ സാഹചര്യത്തില്‍ നിന്നും തിരിച്ചുവന്ന ആര്‍സിബിയുടെ വിജയം നിറഞ്ഞ കണ്ണുകളുമായാണ് കോലി ആഘോഷമാക്കിയത്. ലീഗ് മത്സരങ്ങളിലെ ആദ്യ 8 കളികളില്‍ ഏഴെണ്ണത്തിലും പരാജയപ്പെട്ടതിന് ശേഷമായിരുന്നു ആര്‍സിബിയുടെ തിരിച്ചുവരവ്. കോലി നിറഞ്ഞ കണ്ണുകളോടെ വിജയം വൈകാരികമായി ആഘോഷിച്ചപ്പോള്‍ മറ്റൊരു ഭാഗത്ത് നിശബ്ദതയില്‍ മറഞ്ഞുപോവുകയായിരുന്നു എം എസ് ധോനി ചെയ്തത്.
അടുത്ത ഐപിഎല്ലില്‍ ധോനി കളിക്കുമോ എന്നത് ഉറപ്പില്ല എന്നതിനാല്‍ തന്നെ ക്രിക്കറ്റ് ആരാധകരെ നോവിപ്പിക്കുന്നതായിരുന്നു നിശബ്ദമായുള്ള ധോനിയുടെ ഈ മടക്കം. സാധാരണയായി മത്സരശേഷം എതിര്‍ടീമിലെ കളിക്കാരുമായി നിമിഷങ്ങള്‍ പങ്കുവെയ്ക്കാറുള്ള ധോനി പവലിയനിലേക്ക് നിശബ്ദമായി പോകുന്ന കാഴ്ച ഐപിഎല്ലിന്റെ തന്നെ നോവുള്ള കാഴ്ചയായി മാറി. അതേസമയം ഐപിഎല്‍ ചരിത്രത്തിലെ തന്നെ ഏറ്റവും മികച്ച തിരിച്ചുവരവാണ് ഈ സീസണില്‍ ആര്‍സിബി നടത്തിയത്. അതിനാല്‍ തന്നെ നേരം പുലരുവോളം ബാംഗ്ലൂര്‍ ആഘോഷലഹരിയിലായിരുന്നു.
