യുഎസ് സൈന്യത്തെ ഉടന്‍ രാജ്യത്തിന് പുറത്താക്കണമെന്ന് ഇറാഖ് പാര്‍ലമെന്റ്

ഇറാഖില്‍നിന്ന് യുഎസ് സൈന്യത്തെ പുറത്താക്കണമെന്ന് ഇറാഖ് പാര്‍ലമെന്റ് സര്‍ക്കാരിനോട് ആവശ്യപ്പെട്ടു. ഇറാന്‍-യുഎസ് സംഘര്‍ഷം മൂര്‍ച്ഛിച്ച പശ്ചാത്തലത്തിലാണ് ഇറാഖ് പാര്‍ലമെന്റിന്റെ ആവശ്യം. ഇറാന്‍ ഉന്നത സൈനിക കമാന്‍ഡര്‍ ഖ്വാസി സുലൈമാനിയെ യുഎസ് സൈന്യം വധിച്ചതിന് പിന്നാലെ യുദ്ധസമാനമാണ് പശ്ചിമേഷ്യയിലെ നിലവിലെ സംഘര്‍ഷം.

ഞായറാഴ്ച അസാധാരണ പാര്‍ലമെന്റ് സമ്മേളനം ചേര്‍ന്നാണ് ഈ ആവശ്യം ഉന്നയിച്ചത്. എല്ലാ വിദേശ സൈന്യത്തെയും രാജ്യത്ത് പുറത്താക്കണം എന്നതാണ് പാര്‍ലമെന്റ് പാസാക്കിയ പ്രമേയം. 

രാജ്യത്ത് ഐഎസിനെ നേരിടുന്നതിനായി യുഎസ് നേതൃത്വത്തിലുള്ള സഖ്യസൈന്യവും ഇറാഖി സേനയും ഒരുമിച്ച് പ്രവര്‍ത്തിക്കുകയാണ്. ഇത് അവസാനിപ്പിക്കണം എന്നാണ് പാര്‍ലമെന്റിന്റെ നിര്‍ദേശം.