ലിബിയയിലെ ഏകാധിപതിയായ ജനറല്‍ ഗദ്ദാഫിയെയും ഗദ്ദാഫിയുടെ ക്രൂരതകളെയും ജനങ്ങള്‍ക്ക് മുമ്പിലെത്തിക്കാന്‍ മുന്‍‌കൈ എടുത്ത മാധ്യമ സ്ഥാപനമായ അല്‍ ജസീറ ടിവിയുടെ ക്യാമറാമാന്‍ അലി ഹസന്‍ അല്‍ ജബറിനെ അജ്ഞാതര്‍ വെടിവെച്ച് കൊന്നു. ജനകീയ പ്രക്ഷോഭം കൊടുമ്പിരി കൊണ്ടിരിക്കുന്ന ലിബിയയില്‍ കശാപ്പ് ചെയ്യപ്പെടുന്ന ആദ്യത്തെ മാധ്യമപ്രവര്‍ത്തകനാണ് അലി ഹസന്‍. ഗദ്ദാഫി സര്‍ക്കാരിനെ താങ്ങി നിര്‍ത്താന്‍ ശ്രമിക്കുന്ന ഒരു കൂട്ടം സൈനികരാണ് അലി ഹസനെ വധിച്ചതെന്ന് സ്ഥിരീകരിക്കപ്പെടാത്ത റിപ്പോര്‍ട്ടുകളുണ്ട്.
ബെന്‍‌ഗാസിക്ക് അടുത്തുള്ള ഹവാരിയില്‍ വച്ചാണ് അലി ഹസന്‍ കൊല്ലപ്പെട്ടത്. പ്രക്ഷോഭകാരികള്‍ സര്‍ക്കാരിനെതിരെ നയിച്ച പ്രക്ഷോഭറാലി ചിത്രീകരിച്ച് അപ്‌ലോഡ് ചെയ്യാനായി വരുമ്പോഴാണ് അല്‍ ജസീറ സംഘത്തെ ആയുധധാരികളായ അജ്ഞാതര്‍ ആക്രമിച്ചത്. സംഘത്തിന് നേരെ ഇവര്‍ തുരുതുരാ നിറയൊഴിക്കുകയായിരുന്നു. നെഞ്ചില്‍ മൂന്ന് വെടിയുണ്ട ഏറ്റ നിലയില്‍ ഹസന്‍ അലിയെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
തങ്ങളിലൊരാള്‍ കൊല ചെയ്യപ്പെട്ടു എന്നതുകൊണ്ട് പേടിക്കാനൊന്നും പോകുന്നില്ലെന്നും ലിബിയയില്‍ എന്താണ് നടക്കുന്നതെന്ന് തങ്ങള്‍ പുറം‌ലോകത്തെ അറിയ്സിഛ് കൊണ്ടിരിക്കുന്നതില്‍ യാതൊരു തരത്തിലുള്ള വിട്ടുവീഴ്ചയ്ക്കും തയ്യാറല്ലെന്നും അല്‍ ജസീറ ടിവി അധികൃതര്‍ വ്യക്തമാക്കിയിട്ടുണ്ട്. ആരാണ് ഇതിന് പിന്നിലുള്ളതെന്ന് അറിയാമെന്നും അവരെ നിയമത്തിന് മുന്നില്‍ നിറുത്തുമെന്നും അല്‍ ജസീറ പ്രഖ്യാപിച്ചിട്ടുണ്ട്. അലി ഹസന്‍ കൊല ചെയ്യപ്പെട്ട സംഭവം ഞെട്ടലോടെയാണ് മാധ്യമപ്രവര്‍ത്തകര്‍ അറിഞ്ഞത്. ലിബിയയില്‍ അഭിപ്രായ സ്വാതന്ത്ര്യം ഇല്ല എന്നതിന്റെ ഏറ്റവും വലിയ ഉദാഹരണമാണിതെന്ന് മാധ്യമപ്രവര്‍ത്തകര്‍ ആരോപിച്ചു.
ഈജിപ്തിലെ ഏകാധിപതിയായ ഹോസ്നി മുബാറക്കിന്റെ സര്‍ക്കാരിനെ പൊതുജനങ്ങള്‍ പ്രക്ഷോഭത്തിലൂടെ വീഴ്ത്തിയതോടെയാണ് ഗള്‍ഫ് മേഖലയിലെ രാജ്യങ്ങളിലെല്ലാം ബഹുജന പ്രക്ഷോഭങ്ങള്‍ ഉയര്‍ന്നുവന്നത്. ഇതില്‍ ഏറ്റവും കടുത്ത പ്രക്ഷോഭം നടക്കുന്നത് ലിബിയയിലാണ്. കഴിഞ്ഞ രണ്ട് മാസമായി ഇവിടെ സൈന്യവും പൊതുജനങ്ങളും ഏറ്റുമുട്ടലിലാണ്. ഏകദേശം രണ്ടായിരം പേര്‍ ഇവിടെ കൊല്ലപ്പെട്ടു എന്നാണ് ഔദ്യോഗികക്കണക്കുകള്‍. എന്നാല്‍ പൊതുജനങ്ങളെ സേന കൊന്നൊടുക്കുകയാണെന്നും പത്തായിരത്തോളം പേര്‍ ഇവിടെ മരിച്ചിട്ടുണ്ടെന്നും പ്രക്ഷോഭകാരികള്‍ പറയുന്നു.