ഫ്രാൻസിൽ അടുത്തിടെ ഒരു ചരിത്രാധ്യാപകനെ മതഭീകരവാദികൾ കൊലപ്പെടുത്തിയ സംഭവം ലോകമാകമാനം വലിയ ചർച്ചയായിരുന്നു. ഈ സംഭവത്തെ ഇസ്ലാമിക ഭീകരാക്രമണം എന്നാണ് ഫ്രഞ്ച് പ്രസിഡന്റായ ഇമ്മാനുവേൽ മാക്രോൺ വിശേഷിപ്പിച്ചത്. അതേസമയം ഫ്രഞ്ച് പ്രസിഡന്റിന്റെ ഈ പ്രതികരണം രാജ്യത്തെ മുസ്ലീം സമൂഹത്തെ ഒന്നടങ്കം അപമാനിക്കുന്നതാണെന്ന് വിമർശനം ഉയർന്നിരുന്നു.
മാക്രോണിന്റെ പരാമർശത്തിന്റെ പശ്ചാത്തലത്തിൽ ഫ്രാൻസിനായി ഇനി അന്താരാഷ്ട്ര ഫുട്‌ബോളിൽ ഫ്രഞ്ച് സൂപ്പർതാരമായ പോൾ പോഗ്‌ബ കളിക്കില്ലെന്ന് പ്രഖ്യാപിച്ചതായി റിപ്പോർട്ടുകൾ വന്നിരുന്നു. ഗ്വിനിയൻ വംശജനായ പോൾ പോഗ്‌ബ സംഭവത്തില് പ്രതിഷേധിച്ച് ഫ്രാൻസിനായി ഇനി ഫുട്ബോൾ കളിക്കില്ലെന്ന വാർത്ത ആദ്യം കൊടുത്തത് മിഡിൽ ഈസ്റ്റിൽ നിന്നുള്ള മാധ്യമങ്ങളായിരുന്നു. തുടർന്ന് സൺ അടക്കമുള്ള ഇംഗ്ലീഷ് മാധ്യമങ്ങളും ഇതേറ്റെടുത്തിരുന്നു. ഇപ്പോളിതാ തന്റെ പേരിൽ വന്ന വാർത്തകളെ തള്ളിപറഞ്ഞിരിക്കുകയാണ് സൂപ്പർതാരം.
