യൂറോകപ്പ് ഫൈനലിൽ ഇറ്റലിക്കെതിരെ നടന്ന ഷൂട്ടൗട്ടിൽ പെനാൽറ്റി നഷ്ടപ്പെടുത്തിയതിനെ തുടർന്ന് കടുത്ത വിമർശനമാണ് ഇംഗ്ലീഷ് യുവതാരം മാർക്കസ് റാഷ്‌ഫോർഡിന് നേരിടേണ്ടി വന്നത്. മത്സരത്തിൽ ഇംഗ്ലണ്ടിനായി കിക്കെടുത്ത ജേഡൻ സാഞ്ചോ,സാക്ക എന്നിവരും അവസരം നഷ്ടപ്പെടുത്തിയിരുന്നു. ഇതിന് പിന്നാലെ കടുത്ത വിമർശനമാണ് 3 താരങ്ങൾക്കെതിരെയും ഉയർന്നത്.
പെനാൽറ്റി അവസരം നഷ്ടപ്പെടുത്തിയതിൽ മാത്രമല്ല. നിറത്തിന്റെ പേരിലും ഈ കളിക്കാർ വംശീയാധിക്ഷേപത്തിന് വിധേയരായി. ഇപ്പോഴിതാ ഇതിന് മറുപടിയുമായി രംഗത്തെത്തിയിരിക്കുകയാ റാഷ്‌ഫോർഡ്. പെനാല്‍റ്റി നഷ്ടപ്പെടുത്തിയതിന് തന്നെ ആർക്കും വിമര്‍ശിക്കാമെന്നും എന്നാല്‍ നിറത്തിന്റെ പേരിലും താന്‍ വന്ന സ്ഥലത്തിന്റേ പേരിലും തന്നെ പരിഹസിക്കാന്‍ ആര്‍ക്കും അവകാശമില്ലെന്നും റാഷ്‌ഫോര്‍ഡ് വ്യക്തമാക്കി. സോഷ്യൽ മീഡിയയിലൂടെയായിരുന്നു താരത്തിന്റെ പ്രതികരണം.
അതേസമയം ഇംഗ്ലീഷ് താരങ്ങളായ റാഷ്‌ഫോര്‍ഡ്, ജേഡന്‍ സാഞ്ചോ, ബുകായോ സാക്ക എന്നിവർക്കെതിരെയുണ്ടായ വംശീയാധിക്ഷേപങ്ങൾ അംഗീകരിക്കാനാവില്ലെന്ന് ഇംഗ്ലീഷ് ഫുട്ബോള്‍ അസോസിയേഷനും വ്യക്തമാക്കി.
