മികച്ച യൂറോപ്പ്യന്‍ ഫുട്ബോള്‍ താരത്തിനുള്ള യുവേഫാ പുരസ്കാരം സൂപ്പര്‍താരം ക്രിസ്റ്റ്യാനോ റൊണാള്‍ഡോ സ്വന്തമാക്കി. 2013-14 സീസണിലെ പ്രകടനത്തിന്‍റ അടിസ്ഥാനത്തിലാണ് പോര്‍ച്ചുഗലിന്റെ മിന്നും താരം പുരസ്കാരത്തിന് അര്‍ഹനായത്. യൂറോപ്പ്യന്‍ മാധ്യമ പ്രവര്‍ത്തകര്‍ക്കിടയില്‍ നടത്തിയ വോട്ടെടുപ്പിലൂടെയാണ് റൊണാള്‍ഡോയെ യൂറോപ്പ്യന്‍ ഫുട്ബോളറായി തെരഞ്ഞെടുത്തത്.
ഈ അവാര്‍ഡ് ലഭിച്ചതില്‍ താന്‍ സന്തോഷവാനാണെന്നും, ഈ പുരസ്കാരം ടീമംഗങ്ങള്‍ക്ക് സമര്‍പ്പിക്കുന്നുവെന്നും റൊണാള്‍ഡോ വ്യക്തമാക്കി. ടീമംഗങ്ങള്‍ ഇല്ലായിരുന്നുവെങ്കില്‍ തനിക്ക് ഇത് ലഭിക്കില്ലായിരുന്നുവെന്നും പോര്‍ച്ചുഗല്‍ താരം പറഞ്ഞു. ജര്‍മ്മനിയുടെ നാതിന്‍ കെസ്ളറെ മികച്ച വനിതാ ഫുട്ബോളറായും തെരഞ്ഞെടുത്തു. കഴിഞ്ഞ തവണ ഫ്രാന്‍സിന്‍്റെ ഫ്രാങ്ക് റിബറിയായിരുന്നു യൂറോപ്പ്യന്‍ പ്ളയര്‍ പുരസ്കാരം നേടിയത്.