11 വര്‍ഷത്തെ ഇടവേളയ്ക്കു ശേഷം മമ്മൂട്ടിയും മോഹന്‍ലാലും ഒന്നിക്കുന്ന സിനിമയുടെ ഓരോ വിശേഷങ്ങളും അതിവേഗമാണ് സോഷ്യൽ മീഡിയയിൽ വൈറലാകുന്നത്. ആരാധകർ അത്രയേറെ കാത്തിരിപ്പിലാണ്. മമ്മൂട്ടിയും മോഹൻലാലും ഒന്നിക്കുന്ന സിനിമയിലെ ലൊക്കേഷൻ ചിത്രങ്ങൾ സോഷ്യൽ മീഡയിൽ തരംഗമാവുന്നു. സംവിധായകൻ മഹേഷ് നാരായണന്റെ ലൊക്കേഷനിൽ നിന്നും മമ്മൂട്ടിക്കും മോഹൻലാലിനുമൊക്കൊപ്പമുള്ള സെൽഫി കുഞ്ചാക്കോ ബോബനാണ് സോഷ്യൽ മീഡയിൽ പങ്കുവെച്ചത്.
മലയാളത്തിന്റെ ബിഗ് എംസിനൊപ്പം എന്ന കുറിപ്പോടെയാണ് ചാക്കോച്ചൻ സെൽഫി പങ്കുവെച്ചത്. ഒരു മഹേഷ് നാരായണൻ ചിത്രം എന്നും പോസ്റ്റിലുണ്ട്. മമ്മൂട്ടിയും ഈ സെൽഫി തന്റെ ഫേസ്‌ബുക്കിൽ പങ്കുവെച്ചിട്ടുണ്ട്. മഹേഷ് നാരായണൻ സംവിധാനം ചെയ്യുന്ന ചിത്രത്തിൽ കുഞ്ചാക്കോ ബോബനും ഒരു പ്രധാനവേഷത്തിലുണ്ട്. കൊളംബോയാണ് ചിത്രത്തിന്റെ പ്രധാന ലൊക്കേഷൻ.
ബിഗ് ബജറ്റില്‍ ചിത്രത്തില്‍ മലയാളത്തിന്റെ താരരാജാക്കന്മാര്‍ക്കൊപ്പം സൂപ്പര്‍താരങ്ങളായ ഫഹദ് ഫാസിലും അഭിനയിക്കുന്നുണ്ട്. ലേഡി സൂപ്പര്‍സ്റ്റാര്‍ മഞ്ജു വാരിയര്‍ ആണ് നായിക. ഫഹദ് ഫാസില്‍ കൂടി എത്തിയ ശേഷമാകും സിനിമയുടെ ഔദ്യോഗിക പ്രഖ്യാപനം. ആന്‍ മെഗാ മീഡിയയുടെ ബാനറില്‍ ആന്റോ ജോസഫ്, ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍, മമ്മൂട്ടി കമ്പനിയുടെ ബാനറില്‍ മമ്മൂട്ടി എന്നിവര്‍ ചേര്‍ന്നാണ് സിനിമയുടെ നിര്‍മാണം.
