തമിഴ്നാട് മുഖ്യമന്ത്രി ജയലളിതയുടെ മരണത്തിന് പിന്നിലെ ദുരൂഹതകൾ പുറത്ത് കൊണ്ടുവരണമെന്ന് നടി ഗൗതമി. തന്റെ ഔദ്യോഗിക ബ്ലോഗിലൂടെയാണ് ഗൗതമി ഇക്കാര്യം വ്യക്തമാക്കുന്ന കത്ത് തയ്യാറാക്കിയിരിക്കുന്നത്. പ്രധാനമന്ത്രി നരേന്ദ്ര മോദിയോടാണ് ഗൗതമിയുടെ ആവശ്യം. മോദിയെ അഭിസംബോധന ചെയ്താണ് ഗൗതമി കത്ത് തയ്യാറാക്കിയിരിക്കുന്നത്.
ജയലളിതയുടെ മരണവുമായി ബന്ധപ്പെട്ട് തമിഴ്നാട് മക്കളുടെ മനസ്സിൽ ഒരുപാട് ചോദ്യങ്ങൾ ഉണ്ടെന്നും അതിനെല്ലാം ഉത്തരം കണ്ടെത്താൻ കഴിയണമെന്നും ഗൗതമി പറയുന്നു. ജയലളിതയെ ആശുപത്രിയിൽ പ്രവേശിപ്പിച്ചത്, ചികിത്സ, രോഗം കുറഞ്ഞുവെന്ന വാർത്ത, അപ്രതീക്ഷിതമായ മരണം തുടങ്ങിയ സംഭവങ്ങളെല്ലാം സംശയാസ്പദമാണെന്ന് ഗൗതമി പറയുന്നു.
ജയലളിതയുടെ ചികിത്സയും രോഗ വിവരവും തുടങ്ങിയ കാര്യങ്ങളെല്ലാം ആദ്യം മുതലേ മൂടിവെയ്ക്കുന്നു. ചികിത്സയിൽ ആയിരുന്ന മുഖ്യമന്ത്രിയെ കാണാൻ ആർക്കും അനുവാദമുണ്ടായിരുന്നില്ല. ആശുപത്രിയിൽ എത്തിയെങ്കിലും പ്രമുഖരായ പലർക്കും അവരെ ഒരു നോക്ക് കാണാൻ അനുവാദമുണ്ടായില്ല. ജയലളിതയെ ഇത്രയധികം രഹസ്യസ്വഭാവത്തോടെ മറ്റുള്ളവരിൽ നിന്നും അകറ്റിനിർത്തിയത് ആരാണ്? ആരൊക്കെയാണ് ഇതിനു പിന്നിൽ പ്രവർത്തിച്ചത്? എന്തിനുവേണ്ടിയായിരുന്നു?. ഇക്കാര്യങ്ങൾക്ക് പിന്നിലെ കാരണങ്ങൾ അറിയാതെ പോകരുത്. ഇക്കാര്യത്തിൽ പ്രധാനമന്ത്രി നടപടിയെടുക്കുമെന്നാണ് താൻ കരുതുന്നതെന്നും ഗൗതമി വ്യക്തമാക്കുന്നു.
