മലയാള സിനിമയിലെ സൂപ്പർസ്‌റ്റാർ മോഹൻലാൽ രാഷ്ട്രീയത്തിലേക്ക് ചുവടുവയ്‌ക്കുന്നു എന്നുപറഞ്ഞ് നിരവധി വാർത്തകൾ ഉണ്ടായിരുന്നു. എന്നാൽ താരം തന്നെ തന്റെ രാഷ്ട്രീയ നിലപാട് വ്യക്തമാക്കി ഇപ്പോൾ രംഗത്തുവന്നിരിക്കുകയാണ്. രാഷ്ട്രീയത്തിലേക്കുള്ള തന്റെ പ്രവേശനത്തെപ്പറ്റി വ്യക്തമായ നിലപാട് അദ്ദേഹം വെളിപ്പെടുത്തി.
സ്വതന്ത്രനായി നടക്കാനാണ് ആഗ്രഹിക്കുന്നതെന്നും രാഷ്ട്രീയത്തിലേക്ക് താനില്ലെന്നും മോഹൻലാൽ വ്യക്തമാക്കി. ഒരു മാധ്യമത്തിന് നൽകിയ അഭിമുഖത്തിലാണ് മോഹൻലാൽ തന്റെ നിലപാട് വ്യക്തമാക്കിയത്.
കുറച്ച് നാളുകൾക്ക് മുമ്പ് വ്യക്തിപരമായ ആവശ്യത്തിന് വേണ്ടി മോഹൻലാൽ പ്രധാനമന്ത്രിയെ കാണാൻ പോയതും രാഷ്ട്രീയത്തിലേക്കുള്ള ചുവടുവയ്‌പ്പാണെന്ന് പറഞ്ഞ് ചർച്ചാവിഷയമായിരുന്നു.
'രാഷ്ട്രീയത്തിൽ ഉൾപ്പെടുന്ന ആരുടെ കൂടെ സമയം ചെലവഴിച്ചാലും, പ്രചരിപ്പിക്കപ്പെടുന്ന കാര്യമാണ് ഇത്. അതോടെ ആ രാഷ്ട്രീയ പാർട്ടിയുടെ ആളായി മാറും. പ്രധാനമന്ത്രിയെ കണ്ടു വന്നതോടെ ഞാൻ തിരുവനന്തപുരത്ത് മത്സരിക്കും എന്നുവരെ ആരൊക്കെയോ പറഞ്ഞു പ്രചരിപ്പിച്ചു. പക്ഷെ രാഷ്ട്രീയത്തിലേക്ക് ഞാൻ ഇല്ല, ഒരു രീതിയിലും താല്പര്യമില്ലാത്ത കാര്യമാണ് അത്. എനിക്ക് ഇപ്പോഴുള്ളത് പോലെ സ്വതന്ത്രമായി നടക്കാനാണിഷ്ടം’- മോഹൻലാൽ പറഞ്ഞു.