എഡിഎം നവീന്‍ ബാബുവിന്റെ മരണത്തില്‍ കേസ് ഡയറി ഹാജരാക്കണമെന്ന് ഹൈക്കോടതി നിര്‍ദേശിച്ചു. കുടുംബത്തിന്റെ ഹര്‍ജിയില്‍ സിബി ഐയോട് നിലപാടും തേടിയിട്ടുണ്ട്. വിശദമായ വാദം അടുത്തമാസം ഒന്‍പതിന് കേള്‍ക്കും. എഡിഎം നവീന്‍ ബാബുവിന്റെ മരണം സിബിഐ അന്വേഷിക്കണമെന്നാവശ്യപ്പെട്ടുള്ള ഹര്‍ജി പരിഗണിക്കുകയായിരുന്നു ഹൈക്കോടതി. ജസ്റ്റിസ് ബെച്ചു കുരിയന്‍ തോമസ് അധ്യക്ഷനായ സിംഗിള്‍ ബെഞ്ചാണ് ഹര്‍ജി പരിഗണിച്ചത്. നവീന്‍ ബാബുവിന്റെ ഭാര്യ മഞ്ജുഷയാണ് ഹര്‍ജി നല്‍കിയത്. എഡിഎമ്മിന്റെ മരണം കൊലപാതകം ആണോയെന്ന് സംശയമുണ്ടെന്നും ആരെങ്കിലും കൊലപ്പെടുത്തി കെട്ടിത്തൂക്കിയതാണോയെന്ന സാധ്യത പരിശോധിച്ചില്ലെന്നും യാത്രയയപ്പ് ചടങ്ങിന് ശേഷം ചിലര്‍ നവീന്‍ ബാബുവിനെ കണ്ടിരുന്നുവെന്നുമാണ് ഹര്‍ജിയില്‍ കുടുംബം ആരോപിക്കുന്നത്.
