അറ്റ്‌ലീ സംവിധാനം ചെയ്യുന്ന വിജയ് ചിത്രം ‘തെറി’യുടെ ടീസര്‍ റിലീസ് ചെയ്തു. 100 കോടി ബജറ്റില്‍ ഒരുങ്ങുന്ന സിനിമയുടെ മാസ് ടീസറാണ് പുറത്തുവിട്ടിരിക്കുന്നത്. തികച്ചും വ്യത്യസ്തമായി, ചടുലമായി ഒരുക്കിയിരിക്കുന്ന ടീസര്‍, 1000 കോടി ബജറ്റില്‍ ഒരുക്കിയ ഒരു ഒരു അടിപൊളി സിനിമയുടെ ത്രില്ലാണ് സമ്മാനിക്കുന്നത്.
ഇളയദളപതിയുടെ വ്യത്യസ്ത ഗെറ്റപ്പുകളാണ് ഈ സിനിമയുടെ ഹൈലൈറ്റ്. കലൈപ്പുലി എസ് താണു നിര്‍മ്മിച്ചിരിക്കുന്ന ഈ സിനിമയില്‍ ഇരട്ട വേഷങ്ങളാണ് വിജയ് ചെയ്യുന്നത്. ഒരു പെണ്‍‌കുട്ടിയുടെ പിതാവായ ഐ പി എസ് ഓഫീസറായി വിജയ് തകര്‍ത്തഭിനയിച്ചിരിക്കുകയാണ്.
എമി ജാക്സണും സമാന്തയുമാണ് ചിത്രത്തിലെ നായികമാര്‍. എന്നാല്‍ ഇവരില്‍ ആരും ടീസറില്‍ പ്രത്യക്ഷപ്പെടുന്നില്ല. രാധിക ശരത്കുമാറും പ്രഭുവും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്ന ചിത്രം ജി വി പ്രകാശ് സംഗീതം നല്‍കുന്ന അമ്പതാം ചിത്രമാണ്.
അറ്റ്‌ലീ സംവിധാനം ചെയ്യുന്ന രണ്ടാം ചിത്രമാണ് തെറി. ആദ്യ സിനിമയായ രാ‍ജാറാണി വമ്പന്‍ ഹിറ്റായിരുന്നു. ജോര്‍ജ്ജ് സി വില്യംസ് ക്യാമറ ചലിപ്പിക്കുന്ന തെറി ഏപ്രില്‍ 14ന് പ്രദര്‍ശനത്തിനെത്തും.