വിവാഹത്തെ വീട്ടുകാര്‍ എതിര്‍ത്തു: യുവാവ് കാമുകിയെ കഴുത്തറുത്ത് കൊലപ്പെടുത്തി

പ്രണയ നഷ്ടം സംഭവിച്ചേക്കുമെന്ന് കരുതി യുവാവ് തന്റെ കാമുകിയെ കഴുത്തറുത്ത് കൊലപ്പെടുത്തി.  ഡല്‍ഹിയിലെ ന്യൂ അശോക് നഗര്‍ സ്വദേശിനിയായ യോഗ കുമാരി (21) യാണ് കൊല്ലപ്പെട്ടത്. കഴിഞ്ഞദിവസം വൈകുന്നേരം കാമുകനായ അര്‍ജുന്റെ വീട്ടില്‍ നിന്നായിരുന്നു യോഗയുടെ മൃതദേഹം കണ്ടെത്തിയത്.

സ്വന്തം വീട്ടില്‍ നിന്നും വ്യാഴാഴ്ച പുറത്തു പോയ യോഗ വീട്ടില്‍ തിരിച്ചെത്തിയില്ല. തുടര്‍ന്ന് പെണ്‍കുട്ടിയെ അനേഷിച്ച് വീട്ടുകാര്‍ അര്‍ജുന്റെ വീട്ടിലെത്തിയപ്പോള്‍ വീട് പൂട്ടിയ നിലയിലായിരുന്നു. തുടര്‍ന്ന് അവര്‍ വാതില്‍ പൊളിച്ച് അകത്തുകടന്നപ്പോഴാണ് പെണ്‍കുട്ടിയെ മരിച്ച നിലയില്‍ കണ്ടെത്തിയത്.

ഏറെ നാളായി പ്രണയത്തിലായിരുന്ന യോഗയും അര്‍ജുനും വിവാഹം കഴിക്കാന്‍ ഒരുപാട് ആഗ്രഹിച്ചിരുന്നു. എന്നാല്‍ പെണ്‍കുട്ടിയുടെ വീട്ടുകാര്‍ ഇതിനെതിരെ എതിര്‍പ്പുമായി രംഗത്തെത്തുകയായിരുന്നു. ബിരുദ വിദ്യാര്‍ത്ഥിനിയാണ് കൊല്ലപ്പെട്ട യോഗ.

നോയിഡയിലെ സ്വകാര്യ സ്ഥാപനത്തിലെ ജീവനക്കാരനാണ് അര്‍ജുന്‍. പെണ്‍കുട്ടി സ്വയം പോയതാണോ അര്‍ജുന്‍ വീട്ടിലേക്ക് വിളിച്ചുവരുത്തിയതാണോ എന്നകാര്യം അന്വേഷിക്കുന്നുണ്ടെന്ന് പൊലീസ് പറഞ്ഞു. സംഭവത്തിന് ശേഷം അര്‍ജുന്‍ ഒളിവിലാണ്.