ടി20 ലോകകപ്പ് വിജയത്തിന് ശേഷം പ്രധാനമന്ത്രി നരേന്ദ്രമോദിയുമായി നടത്തിയ സംവാദത്തില്‍ ഇന്ത്യന്‍ സൂപ്പര്‍ താരമായ വിരാട് കോലി നടത്തിയ പ്രതികരണം ആയുധമാക്കി കോണ്‍ഗ്രസ്. ഞാനത് ചെയ്യും എന്ന് സ്വയം ചിന്തിക്കുമ്പോള്‍ അഹങ്കാരം വര്‍ധിക്കുകയാണ് ചെയ്യുന്നതെന്നും അത് കളി കയ്യില്‍ നിന്ന് പോകുന്നതിന് കാരണമാകുമെന്നുമായിരുന്നു ലോകകപ്പിലെ തന്റെ മോശം ഫോമിനെ പറ്റി കോലി പ്രതികരിച്ചത്. ഈ വാക്കുകളാണ് കോണ്‍ഗ്രസ് ആയുധമാക്കിയിരിക്കുന്നത്.
കോലി പറഞ്ഞ വാക്കുകള്‍ സത്യമാണെന്ന് മോദിക്ക് ജൂണ്‍ 4ന് തന്നെ ബോധ്യപ്പെട്ടിട്ടുള്ളതായി കോണ്‍ഗ്രസ് നേതാവ് ജയറാം രമേശ് പറഞ്ഞു. അഹങ്കാരം നമ്മളെ ലക്ഷ്യത്തില്‍ നിന്നും അകറ്റുന്നു എന്ന് കോലി പറഞ്ഞത് എത്ര ശരിയാണ്. അത് മോദിക്ക് ജൂണ്‍ നാലിന് തന്നെ മനസിലായതാണ് ജയറാം രമേസ് എക്‌സില്‍ കുറിച്ചു. ലോകസഭാ തിരെഞ്ഞെടുപ്പില്‍ നാനൂറ് സീറ്റിലും കൂടുതല്‍ നേടി വിജയത്തിലെത്തുമെന്ന മോദി നടത്തിയ അമിതമായ ആത്മവിശ്വാസത്തിന്റെ പശ്ചാത്തലത്തിലാണ് കോണ്‍ഗ്രസ് കോലിയുടെ വാക്കുകള്‍ കടമെടുത്തത്.
