അമേരിക്കക്കെതിരായ മത്സരത്തില്‍ ശിവം ദുബെ ഉള്‍പ്പടെ 6 ബൗളര്‍മാരെയാണ് രോഹിത് പരീക്ഷിച്ചത്. ബാറ്റിംഗിന് ദുഷ്‌കരമായ പിച്ചായിരുന്നിട്ട് കൂടി ശിവം ദുബെ എറിഞ്ഞ ഓവറില്‍ 11 റണ്‍സ് അമേരിക്ക സ്വന്തമാക്കിയിരുന്നു. ദുബെ അടക്കം പന്തെറിഞ്ഞിട്ടും ബൗളറെന്ന നിലയില്‍ എന്തുകൊണ്ട് ജഡേജയ്ക്ക് ഒരു ഓവര്‍ പോലും നല്‍കിയില്ലെന്നാണ് ആരാധകര്‍ ചോദിക്കുന്നത്. നേരത്തെ അയര്‍ലന്‍ഡ്,പാകിസ്ഥാന്‍ എന്നിവര്‍ക്കെതിരെ ജഡേജ പന്തെറിഞ്ഞിരുന്നെങ്കിലും വിക്കറ്റൊന്നും തന്നെ നേടാനായിരുന്നില്ല. പാകിസ്ഥാനെതിരെ ബാറ്റിംഗിന് ഇറങ്ങിയപ്പോള്‍ നേരിട്ട ആദ്യ പന്തില്‍ തന്നെ ജഡേജ പുറത്താവുകയും ചെയ്തിരുന്നു.
പന്തെറിയുന്നില്ലെങ്കില്‍ സ്‌പെഷ്യലിസ്റ്റ് ഫീല്‍ഡര്‍ ക്വാട്ടയിലാണോ ജഡേജ ടീമിലെത്തിയത് എന്നാണ് ആരാധകരുടെ ചോദ്യം. ജഡേജ പന്തെറിയുന്നില്ലെങ്കില്‍ ആ സ്ഥാനത്ത് സ്‌പെഷ്യലിസ്റ്റ് സ്പിന്നറായ കുല്‍ദീപ് യാദവിനെയോ അല്ലെങ്കില്‍ മധ്യനിരയ്ക്ക് ശക്തികൂട്ടാന്‍ സഞ്ജു സാംസണിനെയോ ടീമില്‍ കളിപ്പിക്കണമെന്നാണ് ആരാധകരുടെ ആവശ്യം.
