Virat Kohli: ഇന്ത്യയുടെ റണ്‍മെഷീന്‍ വിരാട് കോലിക്കെതിരെ ആരാധകര്‍. ട്വന്റി 20 ലോകകപ്പിലെ മോശം പ്രകടനമാണ് കോലിക്കെതിരായ ആരാധകരുടെ അതൃപ്തിക്ക് കാരണം. മോശം ഫോം തുടരുന്ന കോലിയെ ഇനിയും പ്ലേയിങ് ഇലവനില്‍ തുടരാന്‍ അനുവദിക്കണോ എന്ന് സെലക്ടര്‍മാരും പരിശീലകനും ആലോചിക്കണമെന്ന് ആരാധകര്‍ അഭിപ്രായപ്പെട്ടു. സൂപ്പര്‍ എട്ടിലെ അഫ്ഗാനിസ്ഥാനെതിരായ മത്സരത്തില്‍ 24 പന്ത് നേരിട്ട് 24 റണ്‍സാണ് കോലി സ്‌കോര്‍ ചെയ്തത്.
ലോകകപ്പില്‍ ഇതുവരെ നാല് ഇന്നിങ്‌സുകളാണ് കോലി കളിച്ചത്. ഇതില്‍ മൂന്നെണ്ണത്തിലും രണ്ടക്കം കാണാതെ പുറത്തായി. ഗ്രൂപ്പ് ഘട്ടത്തില്‍ അയര്‍ലന്‍ഡിനെതിരെ അഞ്ച് പന്തില്‍ ഒരു റണ്‍സും പാക്കിസ്ഥാനെതിരെ മൂന്ന് പന്തില്‍ നാല് റണ്‍സുമാണ് കോലി നേടിയത്. യുഎസ്എയ്‌ക്കെതിരെ ഗോള്‍ഡന്‍ ഡക്കായി. നാല് ഇന്നിങ്‌സുകളില്‍ നിന്നായി 33 പന്തുകളില്‍ 29 റണ്‍സ് മാത്രമാണ് കോലിയുടെ സമ്പാദ്യം. ലോകകപ്പ് കളിക്കുന്ന ഇന്ത്യയുടെ ആദ്യ ആറ് വിക്കറ്റുകളില്‍ ഏറ്റവും കുറവ് റണ്‍സ് കോലിയുടെ പേരിലാണ്. മോശം ഫോമിലുള്ള ശിവം ദുബെയ്ക്ക് വരെ കോലിയേക്കാള്‍ അധികം റണ്‍സുണ്ട്.
