ഇപ്പോ ഞാൻ ആരാ.. എന്താ എന്നെല്ലാം മനസിലായി കാണുമല്ലോ? മരണമാസ് പ്രകടനവുമായി ഉമ്രാൻ മാലിക്

ന്യൂസിലൻഡിനെതിരായ ആദ്യ ഏകദിനത്തിൽ വേഗതകൊണ്ടും കൃത്യത കൊണ്ടും അമ്പരപ്പിച്ച് ഇന്ത്യയുടെ പുതിയ പേസ് സെൻസേഷൻ ഉമ്രാൻ മാലിക്. ഏകദിന ക്രിക്കറ്റിലെ അരങ്ങേറ്റ മത്സരത്തിൽ നിരന്തരം തൻ്റെ പേടിപ്പെടുത്തുന്ന പേസുമായി ന്യൂസിലൻഡ് ബാറ്റർമാരെ ഉമ്രാൻ വിഷമിപ്പിക്കുന്ന കാഴ്ചയാണ് ഓക്ലാൻഡിൽ കാണാനായത്. 

മത്സരത്തീലെ പതിനാറാം ഓവറിലെ രണ്ടാം പന്തിൽ 153.1 കിമീ വേഗത്തിൽ താരം എറിഞ്ഞ പന്ത് ക്രിക്കറ്റ് ആരാധകരെ ആവേശത്തിലാഴ്ത്തുന്നതായിരുന്നു. ഡെവോൺ കോൺവെയുടെ വിക്കറ്റ് സ്വന്തമാക്കികൊണ്ട് അരങ്ങേറ്റ മത്സരം ഉമ്രാൻ അവിസ്മരണീയമാക്കി. കോൺവെയ്ക്ക് പുറമെ ഡാരിൽ മിച്ചലിൻ്റെ വിക്കറ്റും താരം സ്വന്തമാക്കി. അതേസമയം ടോം ലാഥമിൻ്റെയും നായകൻ കെയ്ൻ വില്യംസണിൻ്റെയും ബലത്തിൽ ന്യൂസിലൻഡ് മത്സരം സ്വന്തമാക്കി.

മത്സരത്തിൽ ന്യൂസിലൻഡിൻ്റെ 3 വിക്കറ്റ് മാത്രമാണ് ഇന്ത്യയ്ക്ക് വീഴ്ത്താനയത്. 10 ഓവറിൽ 66 റൺസ് വഴങ്ങി 2 വിക്കറ്റാണ് ഉമ്രാൻ മാലിക് സ്വന്തമാക്കിയത്.