ജൂണ്‍ 20ന് ഇംഗ്ലണ്ടിനെതിരെ തുടങ്ങാനിരിക്കുന്ന ടെസ്റ്റ് പരമ്പരയെ ആകാംക്ഷയോടെയാണ് ഇന്ത്യന്‍ ക്രിക്കറ്റ് ആരാധകര്‍ കാണുന്നത്. രോഹിത് ശര്‍മ, വിരാട് കോലി, രവിചന്ദ്രന്‍ അശ്വിന്‍ എന്നിവര്‍ വിരമിച്ച സാഹചര്യത്തില്‍ പരിചയസമ്പത്ത് കുറഞ്ഞ നിരയുമായാണ് ഇന്ത്യ ഇത്തവണ ഇംഗ്ലണ്ടിലെത്തുന്നത്. ശുഭ്മാന്‍ ഗില്ലിന്റെ നേതൃത്വത്തിലുള്ള ഇന്ത്യന്‍ നിരയ്ക്ക് മുന്നില്‍ വലിയ വെല്ലുവിളിയാകും ഇംഗ്ലണ്ട് എന്നുറപ്പാണ്. കാര്യങ്ങള്‍ ഇങ്ങനെയാണെങ്കിലും പരമ്പരയില്‍ എളുപ്പത്തില്‍ വിജയിക്കാന്‍ ഇംഗ്ലണ്ടിനാകില്ലെന്ന് വ്യക്തമാക്കിയിരിക്കുകയാണ് മുന്‍ ദക്ഷിണാഫ്രിക്കന്‍ പേസറായ ഡെയ്ല്‍ സ്റ്റെയ്ന്‍.
കാര്യങ്ങള്‍ ഇംഗ്ലണ്ടിന് പ്രതീക്ഷിച്ച പോലെ അനായാസമാകില്ല. ഇന്ത്യന്‍ ടീമില്‍ സീനിയര്‍ താരങ്ങളില്‍ പലരുമില്ല, അനുഭവസമ്പത്തുള്ള താരങ്ങളും കുറവാണെങ്കിലും ഇംഗ്ലണ്ടിന് എളുപ്പത്തില്‍ വിജയിക്കാനാവില്ല. ശക്തമായ പോരാട്ടം തന്നെ ഇന്ത്യ നടത്തും. ഓരോ മത്സരത്തിനും ഫലമുണ്ടാകും. ടെസ്റ്റ് പരമ്പര 3-2ന് ഇംഗ്ലണ്ടിന്റെ പക്ഷത്തേക്ക് പോകും. എങ്കിലും എല്ലാ മത്സരങ്ങളും ആവേശകരമായിരിക്കും ഡെയ്ല്‍ സ്റ്റെയ്ന്‍ പറഞ്ഞു.
