മാര്‍ക്രത്തെ കുറിച്ച് ഇന്ത്യന്‍ താരം വിരാട് കോലി വര്‍ഷങ്ങള്‍ക്കു മുന്‍പ് നടത്തിയ പ്രവചനമാണ് ഇപ്പോള്‍ ക്രിക്കറ്റ് ആരാധകര്‍ക്കിടയില്‍ ചര്‍ച്ചയായിരിക്കുന്നത്. കൃത്യമായി പറഞ്ഞാല്‍ ഏഴ് വര്‍ഷവും മൂന്ന് മാസവും മുന്‍പ് മാര്‍ക്രത്തെ കുറിച്ച് സമൂഹമാധ്യമത്തില്‍ കോലി കുറിച്ചത് ഇങ്ങനെയാണ്, 'ഏദന്‍ മാര്‍ക്രത്തിന്റെ ബാറ്റിങ് എന്ത് മനോഹരമായ കാഴ്ചയാണ്'
ഓസ്‌ട്രേലിയയുടെ ദക്ഷിണാഫ്രിക്കന്‍ പര്യടനത്തില്‍ 2018 മാര്‍ച്ച് 22 മുതല്‍ 25 വരെ നടന്ന മൂന്നാം ടെസ്റ്റ് മത്സരത്തിലെ മാര്‍ക്രത്തിന്റെ ബാറ്റിങ് കണ്ടാണ് അന്ന് കോലി ഈ വാക്കുകള്‍ പങ്കുവെച്ചത്. ഒന്നാം ഇന്നിങ്‌സില്‍ പൂജ്യത്തിനു പുറത്തായ മാര്‍ക്രം അന്ന് രണ്ടാം ഇന്നിങ്‌സില്‍ 145 പന്തില്‍ 10 ഫോറും രണ്ട് സിക്‌സും സഹിതം 84 റണ്‍സ് നേടിയിരുന്നു. ഈ ഇന്നിങ്‌സ് കണ്ടാണ് കോലി മാര്‍ക്രത്തെ പ്രശംസിച്ചത്. കേപ് ടൗണില്‍ നടന്ന ഈ ടെസ്റ്റ് മത്സരത്തില്‍ ദക്ഷിണാഫ്രിക്ക 322 റണ്‍സിനു ജയിച്ചു.
