പാക്കിസ്ഥാനെതിരായ മത്സരത്തില്‍ പത്ത് വിക്കറ്റിനു തോറ്റ ഇന്ത്യ ടി 20 ലോകകപ്പ് സൂപ്പര്‍ 12 പോരാട്ടത്തില്‍ ന്യൂസിലന്‍ഡിനെ നേരിടാന്‍ തയ്യാറെടുപ്പുകള്‍ ആരംഭിച്ചു. മികച്ച മാര്‍ജിനിലുള്ള ജയത്തിന് അപ്പുറം മറ്റൊന്നും ഇന്ത്യ ആഗ്രഹിക്കുന്നില്ല. പാക്കിസ്ഥാനെതിരായ പ്ലേയിങ് ഇലവനില്‍ നിന്ന് രണ്ടോ മൂന്നോ മാറ്റങ്ങള്‍ ഇന്ത്യ ന്യൂസിലന്‍ഡിനെതിരെ നടത്തുമെന്നാണ് പുറത്തുവരുന്ന റിപ്പോര്‍ട്ടുകള്‍.
പ്രധാനമായും രണ്ട് മാറ്റങ്ങള്‍ ടീമില്‍ ഉറപ്പായിട്ടുണ്ട്. ഭുവനേശ്വര്‍ കുമാറിന് പകരം ശര്‍ദുല്‍ താക്കൂര്‍ മൂന്നാം പേസര്‍ ആയി ടീമില്‍ സ്ഥാനം പിടിക്കും. ഹാര്‍ദിക് പാണ്ഡ്യയെ മധ്യനിരയില്‍ നിന്ന് ഒഴിവാക്കും. പകരം ഇഷാന്‍ കിഷന്‍ ആയിരിക്കും ഇന്ത്യയുടെ പ്ലേയിങ് ഇലവനിലേക്ക് എത്തുക. വരുണ്‍ ചക്രവര്‍ത്തിക്ക് പകരം രാഹുല്‍ ചഹറിനെ കളത്തിലിറക്കുമോ എന്നും കണ്ടറിയണം.