കോവിഡ് -19 മൂലം ചൈനയിൽ 3,270 പേർ മരിക്കുകയും 81,093 പേർക്ക് രോഗം ബാധിക്കുകയും ചെയ്തു എന്നാണ് സി ജിൻ‌പിംഗ് സർക്കാർ പറയുന്നത്. എന്നാല്‍ ചൈനയിലെ ജനങ്ങള്‍ക്ക് ഇത് പൂര്‍ണമായും വിശ്വസിക്കാന്‍ കഴിയുന്നില്ല. അവര്‍ ഇക്കാര്യത്തില്‍ വിയോജിപ്പ് രേഖപ്പെടുത്തിക്കൊണ്ട് രംഗത്തുവരികയാണ്. കഴിഞ്ഞ മൂന്ന് മാസത്തിനിടെ സെൽഫോൺ ഉപയോക്താക്കളുടെ എണ്ണം 21 ദശലക്ഷം കുറഞ്ഞുവെന്ന് പലരും ചൂണ്ടിക്കാണിക്കുന്നു. ഈ 2.1 കോടി ജനങ്ങള്‍ എവിടെപ്പോയി എന്നാണ് അവര്‍ ചോദിക്കുന്നത്?
ന്യൂയോർക്കില്‍ വസിക്കുന്ന ചൈനീസ് ബ്ലോഗറായ ജെന്നിഫർ സെങ് മാർച്ച് 19 ന് പുറത്തിറക്കിയ റിപ്പോര്‍ട്ട് പ്രകാരം, സെൽഫോൺ ഉപയോഗിക്കുന്നവരുടെ എണ്ണം ഫെബ്രുവരിയിൽ 1.600957 ബില്ല്യണില്‍ നിന്ന് 1.579927 ബില്യണായി കുറഞ്ഞു. അതുപോലെ തന്നെ ലാൻഡ്‌ലൈൻ ഉപയോക്താക്കളുടെ എണ്ണം 190.83 ദശലക്ഷത്തിൽ നിന്ന് 189.99 ആയി കുറഞ്ഞു. അതായത് ഒറ്റ മാസം കൊണ്ട് ലാന്‍ഡ്‌ലൈന്‍ ഉപയോക്താക്കളുടെ എണ്ണത്തില്‍ 840,000 പേരുടെ കുറവ്.
ചൈനീസ് സെൽഫോൺ വിപണിയിൽ 60 ശതമാനവും കൈവശമുള്ള 'ചൈന മൊബൈൽ' കമ്പനി, ഫേഷ്യൽ സ്കാൻ ആവശ്യകതയെത്തുടർന്ന് 2019 ഡിസംബറിൽ 3.732 ദശലക്ഷം അക്കൗണ്ടുകൾ കൂടി നേടിയെങ്കിലും 2020 ജനുവരിയിൽ അവര്‍ക്ക് 0.862 ദശലക്ഷവും ഫെബ്രുവരിയിൽ 7.254 ദശലക്ഷവും അക്കൌണ്ടുകള്‍ നഷ്ടപ്പെടുകയാണ് ഉണ്ടായത്.
