രജനീകാന്ത് നായകനായെത്തുന്ന 'വേട്ടയ്യന്‍' എന്ന ചിത്രത്തിനായുള്ള കാത്തിരിപ്പിലാണ് ആരാധകര്‍. ടിജി ജ്ഞാനവേല്‍ ഒരുക്കുന്ന ചിത്രത്തില്‍ മഞ്ജു വാര്യര്‍ ആണ് നായിക. ഫഹദ് ഫാസിലും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ബോളിവുഡില്‍ നിന്നും അമിതാഭ് ബച്ചനും വേട്ടയ്യനില്‍ അഭിനയിക്കുന്നുണ്ട്. ഒക്ടോബര് 10 നാണ് സിനിമ തീയറ്ററുകളില്‍ എത്തുക.
33 വര്‍ഷങ്ങള്‍ക്ക് ശേഷമാണ് ഇന്ത്യന്‍ സിനിമയിലെ തന്നെ രണ്ട് സൂപ്പര്‍ താരങ്ങള്‍ ഒരുമിച്ചെത്തുന്നത്. ബച്ചന്റെ കഥാപാത്രത്തെ കുറിച്ച് കൂടുതല്‍ റിപ്പോര്‍ട്ടുകളൊന്നും അണിയറ പ്രവര്‍ത്തകര്‍ പുറത്തുവിട്ടിട്ടില്ല. ഇപ്പോഴിതാ, താരങ്ങളുടെ പ്രതിഫലത്തെ സംബന്ധിച്ച റിപ്പോര്‍ട്ട് ആണ് സോഷ്യല്‍ മീഡിയയില്‍ ചര്‍ച്ചയാകുന്നത്. വേട്ടയ്യനില്‍ ഏറ്റവും കൂടുതല്‍ പ്രതിഫലം വാങ്ങുന്നത് രജനീകാന്ത് തന്നെയാണ്. 100 മുതല്‍ 120 കോടി വരെയാണത്രേ അദ്ദേഹത്തിന്റെ പ്രതിഫലം.
അമിതാഭ് ബച്ചന്‍ വാങ്ങുന്നത് വെറും 7 കോടിയാണ്. കാരണം മുഴുനീള കഥാപത്രമല്ല അദ്ദേഹം അവതരിപ്പിക്കുന്നത്. 7 കോടിയാണ് അദ്ദേഹത്തിന്റെ പ്രതിഫലം എന്നാണ് വിവരം. ഫഹദ് ഫാസിലിന്റെ പ്രതിഫലം 4 കോടിയാണ്. മഞ്ജു വാര്യരേക്കാള്‍ വളരെ കൂടുതല്‍ തുകയാണ് ഫഹദിന് ലഭിച്ചത്. മലയാളത്തില്‍ ഏറ്റവും കൂടുതല്‍ പ്രതിഫലം വാങ്ങുന്ന നടിമാരില്‍ ഒരാളാണ് മഞ്ജു വാര്യര്‍. 1 കോടി വരെയാണ് പ്രതിഫലം എന്നാണ് റിപ്പോര്‍ട്ട്. എന്നാല്‍ വേട്ടയ്യനില്‍ 85 ലക്ഷമാണ് മഞ്ജുവിന് പ്രതിഫലമായി ലഭിച്ചതെന്നാണ് വിവരം. റാണക്ക് 5 കോടിയും റിഷിക സിങ്ങിന് 25 ലക്ഷവുമാണ് പ്രതിഫലമായി ലഭിച്ചതെന്നും റിപ്പോര്‍ട്ടുകള്‍ പറയുന്നു.
സൂര്യയെ നായകനാക്കി ഒരുക്കിയ ജയ് ഭീമിന് ശേഷം ജ്ഞാനവേല്‍ ഒരുക്കുന്ന ചിത്രം കൂടിയാണ് വേട്ടയ്യന്‍. അതുകൊണ്ട് തന്നെ വലിയ പ്രതീക്ഷയാണ് പ്രേക്ഷകര്‍ക്കുള്ളത്.