പൃഥ്വിരാജ് സുകുമാരന്റേതായി പുറത്തു വരാനുള്ള നിരവധി ചിത്രങ്ങളുടെ കൂട്ടത്തില്‍ ആരാധകര്‍ ഏറെ പ്രതീക്ഷയോടെ കാത്തിരിക്കുന്ന സിനിമയാണ് ആടുജീവിതം. ഉടന്‍തന്നെ ആടുജീവിതം പ്രദര്‍ശനത്തിന് എത്തുമെന്ന സൂചന പൃഥ്വി നല്‍കി. സിനിമയുടെ പൂജ ചടങ്ങുകള്‍ നടന്നിട്ട് അഞ്ചുവര്‍ഷവും ഒരു ദിവസവും പിന്നിട്ട വേളയിലാണ് നടന്‍ ഒരു അപ്‌ഡേറ്റ് നല്‍കിയത്.
പൃഥ്വിരാജിന്റെ സര്‍വൈവല്‍ ഡ്രാമ ചിത്രമായ 'ആടുജീവിതം' ചിത്രീകരണം നേരത്തെ പൂര്‍ത്തിയാക്കിയിരുന്നു.
'14 വര്‍ഷം, ആയിരം പ്രതിബന്ധങ്ങള്‍, ഒരു ദശലക്ഷം വെല്ലുവിളികള്‍, മഹാമാരിയുടെ മൂന്ന് തരംഗങ്ങള്‍...എല്ലാം ബ്ലെസിയുടെ മനോഹരമായ ഒരു ലക്ഷ്യത്തിനുവേണ്ടി ! '-എന്നാണ് ചിത്രീകരണം പൂര്‍ത്തിയാക്കിയ ശേഷം പൃഥ്വിരാജ് കുറിച്ചത്.
'ഈ ഇതിഹാസ യാത്ര ഒടുവില്‍ അവസാനിച്ചുവെന്ന് വിശ്വസിക്കാന്‍ കഴിയുന്നില്ല ! നജീബിനും മുഴുവന്‍ ടീമിനും എന്റെ ആശംസകള്‍ ! ബ്ലെസി സാറിന്റെ വിഷന്‍ കണ്ടതിലും സന്തോഷം ! നജീബിലേക്കുള്ള പരകായപ്രവേശത്തിനായി നിങ്ങള്‍ ദിവസങ്ങളോളം ഭക്ഷണം കഴിക്കാതെ പട്ടിണി കിടന്നത് ഞാന്‍ നേരിട്ടു കണ്ടിട്ടുണ്ട് ! മഹാമാരിയും എല്ലാ പ്രതിസന്ധികളും തരണം ചെയ്തതില്‍ നിങ്ങള്‍ക്ക് അഭിനന്ദനം !'-ആടുജീവിതം പൂര്‍ത്തിയാക്കിയ ശേഷം പൃഥ്വിരാജിന്റെ ഭാര്യയായ സുപ്രിയ സോഷ്യല്‍ മീഡിയയില്‍ കുറിച്ചത്.