രണ്ടു ദശകം നീണ്ട അഭിനയജീവിതത്തില്‍ ആദ്യമായി കോമഡിതാരം ഇന്ദ്രന്സ് നായകനാകുന്നു. പുതുമുഖ സംവിധായകന്‍ ജയരാജ്‌ വിജയ്‌ സംവിധാനം ചെയ്യുന്ന 'സുന്ദരനില്‍ സുന്ദരനില്‍' ആണ്‌ ഇന്ദ്രന്സ് നായകനാകുന്നത്‌.
തയ്യല്‍ക്കാരനായി സിനിമയില്‍ എത്തിയ ഇന്ദ്രന്സ് കോസ്‌റ്റിയൂം ഡിസൈനിങ്ങിലൂടെയാണ്‌ കോമഡിതാരമാകുന്നത്‌. ‘ചൂതാട്ടം’ എന്ന സിനിമയിലൂടെആണ്‌ ആദ്യമായി സ്വതന്ത്ര കോസ്‌റ്റിയൂം ഡിസൈനറായത്‌.
പ്രേംനസീര്‍ കാലഘട്ടത്തില്‍ മുതല്‍ സിനിമയുടെ പിന്നണിയില്‍ സജീവമായ ഇന്ദ്രന്സ് പത്മരാജന്‍ അടക്കമുള്ള പ്രമുഖ സംവിധായകര്‍ക്ക്‌ ഒപ്പവും പ്രവര്‍ത്തിച്ചു.
‘സി ഐ ഡി ഉണ്ണികൃഷ്‌ണന്‍’ എന്ന സിനിമയാണ്‌ ഇന്ദ്രന്‍സിന്‍റെ അഭിനയ ജീവിതത്തില്‍ വഴിത്തിരിവായത്‌. പിന്നീടിങ്ങോട്ട്‌ ഇരുനൂറിലേറെ ചിത്രങ്ങളില്‍ അഭിനയിച്ചു. ഇന്ദ്രന്സ് നായകനായ സീരിയലുകളും ശ്രദ്ധിക്കപ്പെട്ടു.
അടൂര്‍ ഗോപാലകൃഷ്‌ണന്‍റേയും ടി വി ചന്ദ്രന്‍റേയും ചിത്രങ്ങളില്‍ വരെ മികച്ച കഥാപാത്രങ്ങളെ അവതരിപ്പിക്കാനായി.
‘സുന്ദരനില്‍ സുന്ദരനില്‍’ രാഷ്ട്രീയക്കാരനായ രാമന്‍ കുട്ടിയെയാണ്‌ ഇന്ദ്രന്സ് അവതരിപ്പിക്കുന്നത്‌. രാമന്‍കുട്ടിയുടെ പാര്‍ട്ടിക്കുള്ളിലെ പോരാട്ടമാണ്‌ സിനിമയുടെ പ്രമേയം.
മുകേഷ്‌, കലാഭവന്‍ മണി, ലാലു അലക്‌സ്‌, ജഗതി ശ്രീകുമാര്‍, ഇന്നസെന്‍റ്‌, സായ്‌കുമാര്‍, അനൂപ്‌ ചന്ദ്രന്‍, മാമുക്കോയ, ബിന്ദു പണിക്കര്‍ തുടങ്ങിയവരും ചിത്രത്തില്‍ അഭിനയിക്കുന്നു.