എണ്ണ വില വീണ്ടും കുറഞ്ഞു

യു എസ് ഓഹരിവിപണി സൂചികകള്‍ കുത്തനെയിടിഞ്ഞതിന്‍റെ പ്രതിഫലനമെന്നോണം അന്താരാഷ്ട്ര വിപണിയില്‍ എണ്ണ വില വീണ്ടും ഇടിഞ്ഞു. ന്യൂയോര്‍ക്ക്‌ മെര്‍ക്കെന്‍റൈല്‍ എക്സ്ചേഞ്ചില്‍ ഏപ്രില്‍ വിതരണത്തിനുള്ള ക്രൂഡോയില്‍ വില ബാരലിന് 35 സെന്‍റ് കുറഞ്ഞ് 38.12 ഡോളറിലെത്തി. ലണ്ടന്‍ ബ്രെന്‍റ് ക്രൂഡിന് ആറ് സെന്‍റ് കുറഞ്ഞ് 40.93 ഡോളറാണ് വില.

സാമ്പത്തിക മാന്ദ്യത്തില്‍ നിന്ന് സമീപ ഭാവിയില്‍ ഒരു തിരിച്ചുവരവുണ്ടാവില്ലെന്ന ആശങ്ക നിക്ഷേപകരില്‍ ശക്തമായതോടെ യു എസ് ഓഹരി വിപണികള്‍ തിങ്കളാഴ്ച കുത്തനെയിടിഞ്ഞ് 12 വര്‍ഷം മുമ്പുള്ള നിരക്കിലേക്കെത്തിയിരുന്നു. ഡൌജോണ്‍സ് വിപണിയില്‍ 3.14 ശതമാനത്തിന്‍റെയും സ്റ്റാന്‍ഡേര്‍ഡ് ആന്‍ഡ് പുവേഴ്സ് വിപണിയില്‍ 3.41 ശതമാനത്തിന്‍റെയും നസ്ഡാക് വിപണിയില്‍ 3.71 ശതമാനത്തിന്‍റെയും ഇടിവാണ് കഴിഞ്ഞ ദിവസം അനുഭവപ്പെട്ടത്. മറ്റ് ഏഷ്യന്‍ വിപണികളിലും സ്ഥിതി വ്യത്യസ്തമായിരുന്നില്ല.

എണ്ണ ഉപഭോഗം കുറയുമെന്ന നിക്ഷേപകരുടെ അശങ്ക നിലനില്‍ക്കുന്നതും വിലയിയിടിവിന് കാരണമായി. ഒബാമ ഭരണകൂടം അനുവദിച്ച 787 ബില്യണ്‍ ഡോളറിന്‍റെ സാമ്പത്തിക സഹായ പദ്ധതി നിലവിലെ മാന്ദ്യം മറികടക്കാന്‍ പര്യാപ്തമല്ലെന്ന സൂചനകള്‍ വ്യവസായ മേഖലകള്‍ പ്രകടപ്പിച്ചുതുടങ്ങിയിട്ടുണ്ട്.

കഴിഞ്ഞ വര്‍ഷം ജൂണില്‍ എണ്ണ വില ബാരലിന് 147.27 ഡോളറിലെത്തിയതിനു ശേഷം ഏതാണ്ട് 75 ശതമാനത്തിന്‍റെ കുറവാണ് സംഭവിച്ചിരിക്കുന്നത്. ഡിസംബറില്‍ എണ്ണവില പോയവര്‍ഷത്തെ ഏറ്റവും താഴ്ന്ന നിരക്കായ 33.20 ഡോളറിലെത്തി റെക്കോര്‍ഡിട്ടിരുന്നു. അമേരിക്കന്‍ സാമ്പത്തിക തകര്‍ച്ചയും കനത്ത തൊഴില്‍ നഷ്ടവും എണ്ണ ഉപഭോഗം കുറച്ചതാണ് വിലയിടിവിന് കാരണമായത്.

അമേരിക്കയില്‍ തൊഴിലില്ലായ്മ വര്‍ദ്ധിക്കുമെന്ന് കാണിച്ച് വിവിധ ഏജന്‍സികള്‍ കഴിഞ്ഞദിവസം പുറത്തിറക്കിയ റിപ്പോര്‍ട്ട് എണ്ണ വിലയില്‍ സ്വാധിന്നം ചെലുത്തി. 7.6 ശതമാനമാണ് നിലവില്‍ അമേരിക്കയിലെ തൊഴിലില്ലായ്മ നിരക്ക്. കഴിഞ്ഞ 16 വര്‍ഷത്തിനിടെയുള്ള ഏറ്റവും കൂടിയ നിരക്കാണിത്. 2009ല്‍ ഇത് ഒമ്പത് ശതമാനമായി വര്‍ദ്ധിക്കുമെന്നാണ് പ്രമുഖ സാമ്പത്തിക നിരീക്ഷകരായ നാഷണല്‍ അസോസിയേഷന്‍ ഫോര്‍ ബിസിനസ് എക്കണോമിക്സ് അഭിപ്രായപ്പെടുന്നത്. രാജ്യത്ത് 2009ല്‍ ജനുവരിയില്‍ മാത്രം 5.98 ലക്ഷം പേര്‍ക്ക് തൊഴില്‍ നഷ്ടമായിരുന്നു.

സാമ്പത്തിക പ്രതിസന്ധി രൂക്ഷമാകുന്നതോടെ അമേരിക്കയില്‍ സാമ്പത്തിക സ്ഥാപനങ്ങളുടെ തകര്‍ച്ച തുടരുകയാണ്. എട്ട് അമേരിക്കന്‍ ബാങ്കുകളാണ് ഫെബ്രുവരിയില്‍ മാത്രം അമേരിക്കയില്‍ തകര്‍ന്നത്. ജനുവരിയില്‍ ആറ് ബാങ്കുകളാണ് അടച്ചുപൂട്ടിയത്.

രണ്ടാമത്തെ വലിയ സാമ്പത്തിക ശക്തിയായ ജപ്പാനും വെല്ലുവിളി നേരിടുകയാണ്. ജപ്പാന്‍റെ സാമ്പത്തിക വളര്‍ച്ച മൂന്നാം പാദത്തെ അപേക്ഷിച്ച് 3.3 ശതമാനത്തിന്‍റെ കുറവാണ് നാലാം പാദത്തില്‍ നേരിട്ടത്. 1974ന് ശേഷം ആ രാജ്യം നേരിടുന്ന ഏറ്റവും കുറഞ്ഞ വളര്‍ച്ചയാണിത്. മറ്റ് വികസിത രാ‍ജ്യങ്ങളിലെ സാമ്പത്തിക സ്ഥിതിയും മെച്ചമല്ലാത്തതിനാല്‍ എണ്ണവിലയില്‍ ഉടനെയൊരു ഉയര്‍ച്ച ഉണ്ടാവില്ലെന്നാണ് വിലയിരുത്തല്‍.

മാര്‍ച്ച് പകുതിയോടെ എണ്ണ ഉല്‍പാദനത്തില്‍ കുറവേര്‍പ്പെടുത്തുമെന്ന ഒപെക് റിപ്പോര്‍ട്ട് പുറത്ത് വന്നതോടെയാണ് കഴിഞ്ഞ ദിവസം എണ്ണ വില അല്‍പമെങ്കിലും നിയന്ത്രിക്കാനായത്.