ഡിസംബർ 27നാണ് പ്രസവ വേദനയെ തുടർന്ന് യുവതിയെ വിരുദ്ധചലം സർക്കാർ ആശുപത്രിയിൽ പ്രവേശിപ്പിക്കുന്നത്. സിസേറിയനിലൂടെ യുവതി ഒരു പെൺകുഞ്ഞിന് ജൻമം നൽകുകയും ചെയ്തു. എന്നാൽ ഡിസംബർ 31ന് കടുത്ത വയറുവേദനയെ തുടർന്ന് യുവതിയെ പുതുച്ചേരിയിലെ സ്വകാര്യ ആശുപത്രിയിൽ പ്രവേശിപ്പിക്കുകയായിരുന്നു. ഇവിടെ വച്ച് നടത്തിയ ശസ്ത്രക്രിയയിലാണ് യുവതിയുടെ വയറ്റിൽ ശസ്ത്രക്രിയക്ക് ഉപയോഗിക്കുന്ന പഞ്ഞി കണ്ടെത്തിയത്.
ശസ്ത്രക്രിയയിൽ യുവതിയുടെ വയറ്റിൽനിന്നും പഞ്ഞി കണ്ടെത്തിയ വിവരം ആശുപത്രി അധികൃതർ യുവതിയുടെ ബന്ധുക്കളെ അറിയിച്ചു. സിസേറിയനിടെയാവാം പഞ്ഞി വയറ്റിൽ കുടുങ്ങിയത് എന്നാണ് സ്വകാര്യ അശുപത്രിയിലെ ഡോക്ടർമാർ വ്യക്തമാക്കിയത്. തൊട്ടടുത്ത ദിവസം തന്നെ യുവതി മരണപ്പെടുകയും ചെയ്തു. അതേസമയം സ്വകാര്യ ആശുപത്രിയിലെ ചികിത്സാ പിഴവാണ് യുവതിയുടെ മരണത്തിന് കാരണം എന്ന് സർക്കാർ ആശുപത്രി അധികൃതർ ആരോപിക്കുന്നു.
