ഹൈന്ദവരുടെ പ്രധാനപ്പെട്ട 12 ശിവക്ഷേത്രങ്ങളില്‍ ഒന്നായ സോമനാഥ ക്ഷേത്രത്തില്‍ അഹിന്ദുക്കള്‍ പ്രവേശിക്കുന്നതിന് വിലക്ക് വന്നതായി റിപ്പോര്‍ട്ടുകള്‍. അഹിന്ദുക്കൾക്ക് ക്ഷേത്രം സന്ദർശിക്കാൻ ഇനി മുതൽ ക്ഷേത്രം ട്രസ്റ്റിൽ നിന്നും പ്രത്യേക അനുവാദം വാങ്ങണമെന്നും എന്തിനാണ് ക്ഷേത്രം സന്ദർശിക്കുന്നതെന്നതിനു വ്യക്തമായ മറുപടി നൽകണമെന്നുമാണ് അധികൃതരുടെ നിർദേശം. ഇക്കാര്യം ചൂണ്ടിക്കാറ്റി ക്ഷേത്രത്തിനു മുന്നില്‍ പ്രത്യേക നോട്ടീസ് അധികൃതര്‍ പതിച്ചിട്ടുണ്ട്.
സുരക്ഷയുടെ ഭാഗമായാണ് ഇത്തരമൊരു തീരുമാനമെന്നും തെക്കേ ഇന്ത്യയിലെ ഒട്ടേറെ ക്ഷേത്രങ്ങളിൽ ഇതേ വ്യവസ്ഥയുണ്ടെന്നുമാണ് ക്ഷേത്രഭാരവാഹികളുടെ വിശദീകരണം. അതേസമയം സോമനാഥ് ക്ഷേത്രത്തിൽ അഹിന്ദുക്കൾ പ്രവേശിക്കരുതെന്ന തീരുമാനം മതഭ്രാന്തെന്ന് കോൺഗ്രസ് നേതാവ് മനീഷ് തിവാരി പറഞ്ഞു. ഹൈന്ദവ വിശ്വാസത്തിൽ ഉണ്ടായിരുന്ന സഹിഷ്ണുതയും വിശാല മനസ്കതയുമാണ് ഇതിലൂടെ നഷ്ടമാകുന്നത്. ഹൈന്ദവ പണ്ഡിതന്‍മാർ സോമനാഥ് ക്ഷേത്ര ട്രസ്റ്റ് എടുത്ത തീരുമാനം ശരിയാണോ എന്നു വിലയിരുത്തണം, തിവാരി വ്യക്തമാക്കി.
പതിനൊന്നാം നൂറ്റാണ്ടിലെ സോളങ്കി രാജവംശവും പണി കഴിപ്പിച്ചതാണ് ഈ ക്ഷേത്രമെന്നാണ് വിശ്വാസം. സമ്പത്തുകൊണ്ട് ലോകപ്രസിദ്ധി നേടിയ ക്ഷേത്രത്തിനു നേരെ നിരവധി തവണ ആക്രമണങ്ങള്‍ ഉണ്ടായിട്ടുണ്ട്. അന്ന് നിത്യവും ഗംഗയിൽ നിന്നു അഭിഷേകജലവും കാശ്മീരിൽ നിന്നും പൂജാപുഷ്പങ്ങളും എത്തിയിരുന്നു. 10000 ഗ്രാമങ്ങൾ ക്ഷേത്രത്തിന്റെ സ്വത്തായിരുന്നു. പൂജയ്ക്ക് 1000ൽ അധികം ബ്രാഹ്മണർ, തീർത്ഥാടകർക്ക് ക്ഷൗരത്തിനു 300 ക്ഷുരകർ, രത്നങ്ങൾ പതിച്ച വിളക്കുകൾ, 200മന്ന് സ്വർണ്ണത്തിൽ തീർത്ത ചങ്ങല, 56 രത്നാങ്കിത സ്തൂപങ്ങൾ - ഇതായിരുന്നു അന്നത്തെ സോമനാഥ ക്ഷേത്രത്തിന്റെ നില.
1025ൽ മ് ഗസ്നി ക്ഷേത്രം ആക്രമിച്ച് കൊള്ളയടിച്ചു. ഭീമ-ഭോജ രാജാക്കന്മാർ ക്ഷേത്രം വീണ്ടുമുയർത്തി. 1300ൽ അലാവുദ്ദീൻ ഖിൽജിയുടെ സേനാനായകൻ ആലഫ്ഖാൻ വീണ്ടും തകർത്തപ്പോൾ ചൂഢാസനവംശത്തിലെ മഹിപാലൻ വീണ്ടുമുയർത്തി. 1390ൽ മുസഫ്ർ ഷാ 1, 1490ൽ മുഹമ്മദ് ബേഗാറ, 1530ൽ മുസഫ്ർ 2, 1701ൽ ഔറഗസേബ് എന്നിങ്ങനെ പലതവണ തകർക്കപ്പെട്ടേങ്കിലും ഓരോതവണയും ക്ഷേത്രം ഉയർത്തെഴുന്നേറ്റു. 1783ൽ റാണി അഹല്യ ഒരു പുതിയ ക്ഷേത്രം നിർമിച്ചു. 1951 ല്‍ പുതുക്കിപ്പണിഞ്ഞ ക്ഷേത്രമാണ് ഇന്നിപ്പോള്‍ നിലവിലുള്ളത്. നാലുദിവസം നീണ്ടു നില്‍ക്കുന്ന കാര്‍ത്തിക പൗര്‍ണമി ഉത്സവമാണ് ഈ ക്ഷേത്രത്തിലെ പ്രധാന ആഘോഷം.
