താലി ചാർത്താൻ നിമിഷങ്ങൾ മാത്രം ബാക്കി നിൽക്കേ വരനും കൂട്ടരും കല്യാണ പന്തലിൽ നിന്നും ഇറങ്ങിപ്പോയി. നാണം കെടാതിരിക്കാൻ വധുവിനെ മറ്റൊരു യുവാവ് വിവാഹം കഴിച്ചു. ഉത്തർപ്രദേശിലാണ് ഈ വിചിത്രമായ സംഭവം നടന്നത്.
വിവാഹത്തിനായി പന്തലിൽ എത്തിയ വരനും കൂട്ടരും ആ സത്യം തിരിച്ചറിഞ്ഞത് മുഹൂർത്തം അടുത്തപ്പോഴാണ്. വിവാഹശേഷം വിളമ്പുന്ന ഭക്ഷണത്തിൽ നോൺ വെജ് ഇല്ല. വെജിറ്റേറിയൻ മാത്രം. നിയന്ത്രണം വിട്ട വരൻ പരസ്യമായി ഇക്കാര്യം ചോദിച്ചു. നോൺവെജ് വിഭവങ്ങ‌ൾ ഇല്ലാത്ത വീട്ടിൽ നിന്നും പെണ്ണുകെട്ടാൻ തനിയ്ക്ക് താൽപ്പര്യമില്ലെന്ന് പറഞ്ഞ് വരനും കൂട്ടരും കല്യാണ പന്തലിൽ നിന്നും ഇറങ്ങിപ്പോയി.
കല്യാണവീട് മ്ലാനമായത് പെട്ടന്നായിരുന്നു. എന്തു ചെയ്യണമെന്ന് അറിയാതെ നിന്ന വീട്ടുകാരോട് പെണ്ണിനെ തനിക്ക് ഇഷ്ടമാണെന്നും വിവാഹം കഴിക്കാൻ താൽപ്പര്യമുണ്ടെന്നും പറഞ്ഞ് ഒരു യുവാവ് രംഗത്തെത്തി. ഇതോടെ നിശ്ചയിച്ച സമയത്ത് വിവാഹം നടന്നു.
യുപിയിലെ മുഖ്യമന്ത്രിയായ യോഗി ആദിത്യനാഥ് അധികാരത്തിലേറിയപ്പോൾ തന്നെ ഒരുത്തരവ് പ്രഖ്യാപിച്ചിരുന്നു. അനധികൃത അറവുശാലകൾ ഇനിയില്ല. ഇതോടെ ചിക്കനും ബീഫിനും വില കുതിച്ചുയർന്നു. പലയിടത്തും നോൺ വെജ് ലഭിക്കാതെ വന്നു. ഇതായിരുന്നു കല്യാണത്തിന് നോൺ വെജ് ഒഴുവാക്കിയതിന്റെ കാരണം.