പരീക്ഷയില്‍ മാര്‍ക്ക് കുറഞ്ഞ രണ്ട് വിദ്യാര്‍ഥിനികളെ അദ്ധ്യാപിക നഗ്നരാക്കി നിര്‍ത്തിയതായി ആരോപണം. ഹരിദ്വാറിലെ ഒരു ഇംഗ്ലീഷ് മീഡിയം സ്‌കൂളിനെതിരായാണ് പരാതി. ദളിത് വിഭാഗത്തില്‍ പെടുന്ന വിദ്യാര്‍ഥിനികള്‍ വീട്ടില്‍ പറഞ്ഞതോടെയാണ് സംഭവം പുറത്തായത്.
പരീക്ഷയില്‍ മാര്‍ക്ക് കുറഞ്ഞ വിദ്യാര്‍ഥിനികളെ ബലമായി വസ്ത്രം ഊരിക്കുകയും മറ്റു കുട്ടികളുടെ മുന്നില്‍ ക്ലാസ് തീരുന്നതുവരെ നിര്‍ത്തുകയുമായിരുന്നു. മാര്‍ക്ക് കുറഞ്ഞതിന് നാണം കെടുത്തുകയായിരുന്നു അദ്ധ്യാപിക. സംഭവമറിഞ്ഞ് വീട്ടുകാര്‍ പൊലീസില്‍ പരാതി നല്‍കിയതോടെ പ്രദേശവാസികള്‍ പ്രതിഷേധവും സംഘടിപ്പിച്ചു.
സംഭവത്തില്‍ നാട്ടുകാര്‍ പ്രതിഷേധവുമായി സംഘടിച്ചതോടെ അത്തരമൊരു സംഭവം സ്‌കൂളില്‍ നടന്നിട്ടില്ലെന്ന് പ്രിന്‍സിപ്പല്‍ പറഞ്ഞു. തങ്ങളുടെ സ്‌കൂളിന്റെ പേര് ചീത്തയാക്കാനായി മനപൂര്‍വമുണ്ടാക്കിയതാണ് ഈ പരാതിയെന്നാണ് പ്രിന്‍സിപ്പലിന്റെ വാദം. പരാതിയില്‍ അന്വേഷണം നടത്തുകയാണെന്ന് പൊലീസ് ഉദ്യോഗസ്ഥ പ്രമീള ബിഷ്ത് പറഞ്ഞു.